DOLE: 17,000 Bakanteng Trabaho sa Visayas sa Labor Day

Gibutyag sa Department of Labor and Employment (DOLE)-7 nga adunay 17 mil ka mga trabaho ang nagpaabot sa mga aplikante sa upat gyud ka mga job fair nga ilang ipahigayon atol sa kasaulogan sa Labor Day sa Mayo 1 ning tuiga.

Sumala ni DOLE-7 Regional Director Chona Mantilla nga ang nahisgutang mga job fair gisalmotan sa 165 ka mga kompanya nga local ug sa overseas.

Kini aron ang mga mangita og trabaho mo-apply sa Local nga kompanya o kaha sa kompaniya nga gikan sa gawas sa nasud.

Mokabat usab og kapin sa 11 mil ka mga overseas workers ug kapin sa 5 mil ka mga trabahante ang itanyag sa naasoy nga job fair sa DOLE-7, matud pa ni Mantilla.

Gipahayag usab niya nga dinhi sa Sugbo ang labing dakong job fair ipahigayon sa SM diin himoon ang solidarity run sa dili pa sugdan ang maong job fair.

Laing local ug overseas job fair ipahigayon usab sa Kapitolyo, Cebu Sports Center o sa Abellana National School ug ingon man usab sa SM Consolacion.

Midugang si Mantilla nga sa Dumaguete City ang local ug overseas job fair ipahigayon usab didto sa Robinsons mall.

Nagkanayon usab siya nga daghan gyud ang ma-hire on the spot tungod sa kadaghan na sa mga skilled workers sa Central Visayas.