DOH Moabag sa Libreng Tambal, Gasto sa Hospital Alang sa mga Kabus

Gitinguha sa Department of Health (DOH) nga ang tanang kabus nga Pilipino sa nasud makapatambal ug dili na maghuna-huna kun unsaon pagbayad ang ilang galastohon sa ospital.

Kini maoy ikatabang sa Universal Health Care nga programa sa maong ahensya.

Si information officer Elvira C. Bongosa sa Philippine Information Agency 7 (PIA-7) miingon nga si DOH Secretary Enrique Ona, mipasalig nga dili na kinahanglang mohatag pa og bisan unsang papeles ang pasyente sa dili pa sila tambalan tungod sa tabang niini.

Bisan ang pagbaton og utang sa mga pampublikong ospital, mawala na usab gumikan sa tabang sa Universal Health Care.

Matud pa ni Bongosa nga dugay na kining programa sa ahensya diin may mga Filipino pa gihapon nga wala kahibalo niini.

Mao nga alang sa mga gustong makakuha sa libreng tambal, magpalista lamang sa ilang local health worker o mga kawani sa Department of Social Welfare and Development (DSWD).

Tungod niini, si Bongosa nagkanayon nga nangayo og tabang ang kalihim sa DOH sa mga lokal nga kagamhanan aron mapalapad pa ang kampanya niini kabahin sa Universal Health Care nga programa.

Miingon si Bongosa nga kaabag sa DOH ang PhilHealth mao nga daghang Filipino ang matabangan niini diin tanang galastohon abagahon sa gobyerno.

Midugang si Bongosa nga giseguro usab ni Ona nga gipangitaan na nila karon og paagi ang kakulang sa mga nurse, doctor ug bisan ang mga pasilidad sa mga pampublikong ospital.