DOH Mipasalig Motabang sa CCMC Building

Ang Department of Health (DOH) mipasalig na nga motabang sa kagamhanan sa dakbayan sa Sugbo pagpatukod og bag-ong building sa Cebu City Medical Center (CCMC).

Hinuon, si Health Secretary Enrique Ona, nga giadto gayud mismo ni Mayor Michael Rama sa Manila, wala mopasalig nga uyonan niini ang hangyo sa mayor nga usa ka bilyon ka pesos ang igahin nga budget sa DOH alang sa CCMC.

Matud ni Rama nga igo lang mipasalig si Secretary Ona nga motabang, apan wala motangdo sa gipangayo niya nga kantidad aron idugang sa gastohan sa pagpatukod og bag-ong ospital.

Tinguha ni Mayor Rama nga napulo ka andana ang pagatukoron nga bag-ong CCMC aron makadawat kini og labing minus 1,000 ka pasyente apan mogasto kini og kapin sa P1.4 Bilyones.

Ang dakbayan sa Sugbo dili dayon makagahin niini nga gidak-on sa kantidad tungod kay daghan pa usab kini og gastohanan alang sa ubang proyekto. Matud ni Mayor Rama nga kini maoy rason nga magpatabang gayud siya sa DOH ug dili siya pul-an sa pagbalik-balik sa opisina ni Secretary Ona.

Adunay uban nga mihulagway nga daku’ng kauwawan ang gihimo sa mayor apan si Rama miingon nga dili niya igsapayan nga tawgon siya og “professional beggar” basta alang ra sa kaayohan sa katawhan sa dakbayan.

Ang karaan nga building sa CCMC gipaguba na ni Mayor Rama tungod kay matud sa mga engineers peligroso na kini nga gamiton pagpadayon tungod sa dagko nga liki nga nasinati human sa pagtay-og sa kusog nga linog kaniadtong Oktobre 18.