DOH-7: Tipdas Mipatay og 4 ka Tawo

Gibutyag sa Department of Health (DOH)-7 nga upat na ka tawo ang namatay sa tipdas gikan sa bulan sa Enero hangtud ning bulan sa Abril.

Sigon pa sa buhatan ni Regional Epidemiology and Surveillance Unit (RESU)-7 head Renan Cimafranca nga ang upat nga casualties sa tipdas naggikan sa syudad sa Sugbo, lungsod sa Talisay, Naga ug sa Sibonga.

Gipahibalo usab niya nga may 520 ka kaso sa tipdas ang natala sa ilang buhatan gikan sa Enero hangtud karon.

Nag-una gihapon nga labing taas nga gidaghanon sa maong sakit ang syudad sa Sugbo nga may 217 ka kaso ug usa ang patay, gisundan sa syudad sa Lapu-lapu nga may 50 ka kaso, Mandaue city, 23 , lungsod sa Balamban, 17, Loon sa probinsiya sa Bohol, 12, syudad sa Dumaguete ,10, ug lungsod sa Consolacion, Liloan nga pulos 9 ka kaso, ug sa Minglanilla nga 9 usab ka kaso apan usa ang patay.

Tungod niini, gipahibalo sa DOH-7 nga ilang gihingusgan ang pagpabakona sa mga kabataan sa kalungsuran sa upat ka probinsiya.

Nakig-alayon usab ang DOH-7 sa mga municipal ug city health officer sa pagpabakona sa mga kabataan pinaagi sa mga barangay health centers.

Giawhag usab niini ang mga ginikanan sa pagpabakona sa ilang mga kabataan aron dili kini mataptan sa tipdas kay kini makamatay kun pasagdan.