DOH-7: Populasyon sa Nasud Padayo’ng Mosaka

Mabalaod man ang Reproductive Health (RH) o dili, magpadayon gayud ang pagsaka sa populasyon sa nasud. Kini ang gibutyag niadtong Martes, ni Dr. Laksmi Legaspi, DOH-7 Assistant Regional Director kinsa nagkanayon nga ang tanan mag-agad sa konsensya sa magtiayon.

Ang maong opinion gipalanog ni Legaspi sa taga media samtang gipaabot pa ang Supreme Court nga mopakanaog sa iyang desisyon bahin sa RH law.

Nasuta nga mipitisyon ang tanang pari ug obispo sa relihiyong Katoliko sa nasud batok sa pagpasar sa RH Bill ngadto sa pagkabalaod. Kini kay alang kanila, usa ka dakong supak sa balaod sa Dios kinsa maoy nagsugo sa tawo nga magdaghan aron lukpon ang tibuok kalibotan.

Miingon si Legaspi nga magpadayon ang DOH sa trabaho niini pagsangyaw nga dili maayo ang way preno nga pagpanganak.

Iyang gipasabot ang pagpugong ug paghinayhinay sa pagpanganak nga may gintang ang gidak-on sa mga kabataan.

Una sa tanan sumala ni Legaspi nga ang pagpanganak usa ka dakong hulga sa kinabuhi sa usa ka inahan.

“Makita nato nga may ubang mga inahan nga wa pay 18 anyos nagsugod na sa pagpanganak, unya inig-abot og 30 ang edad kumo kay nagpusot-pusot ang mga anak, magyaya nalang ang lawas sa inahan ilabi na kun way maayong trabaho ang bana”, matud pa ni Legaspi.

Miingon siya nga kun mahimo gyud nga balaod ang RH mohatag og libre nga mga konraseptibo ang kagamhanan apan dili nila ipamugos.

Busa tungod kay may mga magtiayon man nga walay konsensya, mahimong magpaturagas lang gihapon sila sa pagpadaghan sa ilang mga anak, mabalaod man o dili ang RH, sumala ni Legaspi.

Ang nasud adunay kasamtangang 95 milyones nga populasyon ug wa nay higayon nga mokibra kini, matud pa ni Legaspi.

Apan makaluluoy kaayo ang way maayong panginabuhi nga daghan og anak kay sa susamang kahimtang nga usa o duha ray anak, dugang pa niya.

Busa tungod kay maluoy ang gobyerno nga magsud-ong sa mga kabus nga daghan og anak, gilusad niini ang kampanya nga unta magpugong ug maghinahinay sa pagpanganak ang managtiayon, matud ni Legaspi.