DOH 7: P500 Milyones Gigahin sa Gobyerno Batok Ebola

Gigahinan sa kagamhanan sa nasud og P500 milyones ang pagpangandam batok sa Ebola, sumala pa ni Dr. Dino Caing, section head sa Regional Epidemiology and Surveilance Unit (RESU) sa Department of Health (DOH)7.

Matud pa ni Caing nga gipaagi sa nasudnong kagamhanan ang maong gahin sa DOH aron malikayan gayud ang makamatay nga sakit.

“Kining P500 milyones mao kini kuhaan sa kagamhanang nasudnon sa mga kinahanglanon kun mag-atiman og masakiton sa Ebola”, matud ni Caing.

Nasayran nga kauban nga bayran sa maong gahin mao ang personal protective equipment (PPE) na gi-order gikan sa gawas.

Ang nag-order niini mao ang tagdumala sa VSMMC agi og pagpangandam batok sa Ebola.

Laing gastohan sa maong gahin mao ang mga seminar, training, ug awareness campaign aron gayud mabansay na nga daan ang mga kawani sa kasanihan batok sa pag-atiman sa masakiton og Ebola.

Miingon si Caing nga kun nangandam man ang gobyerno, angay usab mangandam ang katawhan sa paagi nga kinahanglang masayud sila kun unsa kining Ebola virus.

“Mas maayo man gud nga masayud daan ang tawo nga kining Ebola gikan sa Onggoy sa West Africa, unya giihaw ug gikaon sa tawo ang Onggoy, hinungdan nga mitapot kini sa taga Liberia, Nigeria, Sierra Leone, ug Guinea, ug padayon ang paghugpa niini hangtud karon”, sumala pa ni Caing.

Busa tungod kay didto kini magsukad sa gawas, natural nga ang modala niini nganhi sa nasud mao ang mga biyahedor nga gikan sa gawas ilabi na sa mga nasud sa West Africa, sumala ni Caing.

Tungod kay wala pay nadiskobrehang tambal, ang tawong mataptan niini, moihap lang og 21 diyas, mamatay na, matud niya.

Karong nasayran na sa mga Filipino ang Ebola, labi kining mangandam pag-ayo batok sa maong sakit, miingon si Caing.

Image Credit: huffingtonpost.com