DOH-7 Nagkampanya Batok Sangla

Ang Department of Health (DOH-7) mipakusog sa ilang kampanya sa pagwagtang sa mga kaso sa “leprosy” kun sangla sa Central Visayas.

Ang DOH nakig-alayon usab sa mga local government units (LGUs), mga lider sibika, academia, ug media para sa kasayuran sa kadaghanan ug kampanya sa edukasyon alang sa hingpit nga pagwagtang sa sakit nga sangla, sumala pa ni DOH-7 Regional Director Dr. Jaime Bernadas atol sa Association of Government Information Officers (AGIO-7) forum.

Ang AGIO Forum didto ipahigayon sa buhatan sa DOH7 diin gibutyag ni Bernadas nga nagbansay sila og mga Barangay Health Worker (BHWs) aron sa pag-ila sa mga simtoma sa sakit nga sangla sa mga suspetsadong pasyente aron kini matambalan dayon.

Sumala ni Bernadas nga di makamatay ang sangla kay dali nalang kaayo kini matambalan.

Midugang ang director rehiyonal sa DOH7 nga mahimo ra kini nga tambalan sa balay busa di na kinahanglang dad-on pa sa tambalanan ang pasyente kun masayran kini sa sayo pa kay may mga tambal na nga mapalit sa tindahan.

Apan gipasabot ni Bernadas nga dili usab angay magproblema ang masakiton og sangla kay libre ang tambal nga ikadapat niini gikan sa kagamhanan.

Sa maong AGIO Forum mitambong usab si DOH-7 leprosy control program coordinator Dr. Joanri Riveral kinsa nagkanayon nga ang mga kaso sa sangla sa rehiyon 7 mikibra ngadto sa 277 sa tuig 2012 gikan sa 424 ka kaso nga na-record niadtong tuig 2011.

Matud pa ni Riveral nga dinhi sa Cebu, adunay 75 ka kaso sa sangla sa tuig 2012, nga mas menus kun itandi niadtong 2011 nga may 93 ka kaso sa maong tuig.

Dugang pa ni Riveral nga ilang gimonitor ang mga kaso sa sangla sa mga lugar sama sa Medellin, Bogo City, Bantayan Island, Dumanjug, Moalboal, Ronda, Sibonga, Cordova, and Lapulapu City.

Nagkanayon si Riveral nga ang sangla usa ka sakit nga mananakod nga mugna sa “ rod-shaped bacillus Mycobacterium leprae.”

Motakud kini pinaagi sa mga laway ug sip-on gikan sa baba ug ilong sa usa ka sanglahon kansang sakit dugay na nga wa ka dapati og tambal.

Midugang si Riveral nga ang sangla, kun di dayon katambalan makamugna kini og permanente nga kadaot sa panit, mata, mga ugat ug sa tibuok lawas nga makaparalisar sa tawo.

Ang DOH-Center for Health Development for Central Visayas nagsaulog usab sa World Leprosy Week niadtong Pebrero 10 ngadto sa 14 uban sa tema nga , “Joining Forces – Accelerating Progress” aron sa pagpadasig sa mga hingtungdan nga angay magpakabana bahin sa sangla ug sa pagpauswag sa de kalidad nga pag-atiman sa mga pasyente sa sakit nga sangla.