DOH-7 Naalarma sa Kadaghang Gitipdas

Naalarma ang Department of Health (DOH) 7 sa halos 100 porsento nga pagsaka sa gidaghanaon sa nataptan og tipdas dinhi sa Central Visayas karong tuiga itandi sa miaging tuig.

Ang hepe sa Regional Epidemiology and Surveillance Unit (RESU-7) Dr. Renan Cimafranca mitug-an nga mikabat sa 1,065 ka kaso ug pito ang namatay sa tipdas ang natala karon sa ilang buhatan niining tuiga.

Miingon si Cimafranca nga mas taas kini og 91.4 porsyento itandi sa miaging tuig gikan sa Enero hangtud sa Hulyo nga mikabat lamang og 92 ka kaso ug walay namatay.

Matud pa ni Cimafranca nga mao kini ang hinungdan nga ilang hingusgan ang pagpamakona sa mga kabataan karong bulan sa Septembre niining tuiga. Kini human usab nila masayri nga sagad sa nabiktimang mga bata nga wala mabakonahi batok tipdas.

Nagkanayon si Cimafranca nga giariyahan og mga bakuna batok tipdas ang tanang mga barangay health centers dinhi sa lalawigan sa Sugbo ug ubang probinsiya sa Central Visayas aron nga ipamakona sa kabataan.

Midugang si Cimafranca nga base sa ilang nakuhang record ang napulo ka nag-unang mga lugar nga daghan og kaso sa tipdas sa Central Visayas mao ang syudad sa Sugbo nga may 390 ka kaso ug usa ang namatay, syudad sa Lapu-lapu , may 125 ka kaso, Manadue 96, Talisay 95 , lungsod sa Balamban 40, Dumaguete city 30, Loon ,sa Bohol 26, Asturias 23, Liloan 22, ug Minglanilla 19 ka kaso.