DOH-7: Magpalansang sa Krus Ipaatiman sa LGU

Giawhag sa Department of Health (DOH) – 7 ang mga Local Government Units (LGU) dinhi sa lalawigan sa Sugbo ug sa Central Visayas nga atimanon niini ang mga tawo nga magpalansang sa krus karong Biyernes Santo.

Kini pinaagi sa pagdestino og medical team aron mohatag og tambal human sa pagpalansang sa krus.

Matud pa ni DOH-7 Regional Director Jaime Bernadas nga mahimong may tulubagon ang mga LGU sa higayon nga may mahitabo sa tawo nga magpalansag sa ilang dapit unya sa Biyernes Santo kun dili kini maatiman sa medical team sa naasoy nga LGU.

Giawhag ni Bernadas ang LGU nga susihon dayon ang kahimtang sa panglawas sa mga tawo nga magpalansang human sa nahisgutang kalihukan. Lakip sa suhihon niini ang gigamit niini nga lansang kun limpyo ba ug dili makainpeksyon sa magpalansang.

Hinuon mahimo nga ang mga tawo nga magpalansang sama ni Bilbert Bargayo sa lungsod sa Tuburan papirmahon og waiver sa health officer sa usa ka lugar nga magmatuod nga ilang kabubut-on ang pagpalansang ug wala kiniy basulon kun may dautang mahitabo.

Apan gikinahanglan gihapon nga andaman kini og medical team pagsusi sa kahimtang sa lawas human sa kalihukan.

Daan na nga gitambagan sa DOH-7 ang mga tawo nga magpalansang atul sa Biyernes Santo nga magmatngon bisan tuod kun ila kining sakripisyo ug pagtuman sa panaad tungod kay dilikado kini sa lawas ilabina sa pagbuwad niini sa adlaw nga posibling makamatay kun mahutdan og tubig sa lawas.

Image Credit: rt.com