DOH 7: Kapote ang Dad-on sa Sinulog, Dili Payong

Gipasidan-an sa mga tinugyanan sa panglawas ang taga dakbayan sa Sugbo nga likayan ang pagdala og payong kun motambong sa kalihukan sa Sinulog.

Matud pa ni Dr. Joanri Riveral, Medical Specialist sa Department of Health (DOH)7 kagahapon sa buntag nga dili maayo ang pagdala og payong tungod sa talinis nga tumoy niini.

“Kay simbako kun may stampede makatusok man gud sa lawas sa tawo ang payong busa imbis payong mas maayo pang kapote nalang ang dad-on”, matud pa ni Riveral.

Ang DOH momuntar og 22 ka medical center sa mga eskina nga agian sa Sinulog procession.

Ang maong mga sentro kompleto og mga doktor, nurse, ambulancia ug mga tambal nga daling makatabang sa mga katawhan nga maglain ang lawas samtang mosaksi sa Sinulog.

Mitambag si Riveral nga kun maglain gyud ang lawas sa dili pa mopadulong paingon sa pagsaksi sa Sinulog, “mas maayo pang dili nalang modayon aron nga dili matiwas,” matud pa niya.

Ang panahon karon anaa sa gitawag nga “tail end of cold front” o panagsugat sa init ug bugnaw nga hangin nga sayon kaayong makalipong sa tawo.

Dali nga makapalabad sa ulo, ubo, sip-on, ug hilanat diin ang mga apyugon o kadtong dali ra mgamasakit mas maayo pa nga dili nalang mosuroy sa adlaw sa Sinulog.

Kini aron sa paglikay gikan sa kasamok ug kahuot sa tawo sa maong higayon ug malagmit makapakuyap sa hinay ra og resistensya.

Labaw nga gipasidan-an ni Riveral ang mga may altapresyon, diabetis, canceron ug uban pang may dagkong sakit nga dili angay isum-ok ang kaugalingon sa bagang duot sa katawhan aron nga dili malipong gumikan sa kainit sa panahon.