DOE Mosusi Kun May Pagpanipig ba sa Supply sa Produktong Petrolyo sa Sugbo

Gisusi na karon sa Department of Energy (DOE-7) kun may hoarding o pagpanipig ba sa supply sa mga produkto sa petrolyo dinhi sa Sugbo.

Kini human mopalanog sa ilang mga reklamo ang ubay-ubay nga mga motorista nga gibalibaran sa pipila ka mga gasoline station dinhi sa syudad sa Sugbo tungod kay wala kuno silay supply sa krudo ug gasolina.

Si Engr. Saul Gonzales ang hepe sa Energy Intercede Division sa Department of Energy (DOE)7 mitumbok nga wala silay nadawat nga report nga may shortage sa petroleum products sa Central Visayas ilabina dinhi sa Cebu.

Iyang giklaro nga base sa polisiya sa DOE, ang ilang buhatan hatagan dayon og report sa mga oil companies kun may kakulangan sa supply sa mga produkto sa petrolyo niini dinhi sa tunga-tungang Kabisay-an.

Midugang si Gonzales nga ang ilang buhatan mopahigayon dayon og pakisusi kun may kamatuoran ba sa pagkakulang sa supply sa krudo ug gasolina sa mga gasoline station dinhi sa Sugbo ug unsa usab ang hinungdan niini.

Nagkanayon usab siya nga apilon nila pagsusi kun may nahitabo ba nga pagpanipig ning maong mga produkto tungod kay wala man silay madawat nga report nga may kakulangan sa supply sa lana dinhi sa Visayas.