Diplomasya ang Gigamit ni PNoy Batok China

Gitun-an na karon ni Presidente Benigno ‘Noynoy’ Aquino III ang himuong mga lakang sa gobyerno batok sa paglisud-lisod sa Chinese Coast Guard sa civilian ship nga naghatud og supply sa BRP Sierra Madre sa Ayungin Shoal.

Matud pa ni Kalihim Herminio ‘Sonny’ Coloma Jr. sa Presidential Communication Operation Office (PCOO), dili matay-og ang gobyerno sa padayon nga paggamit og diplomasya ug malinawon nga pagsulbad sa hisgotanan sa West Philippine Sea taliwala sa gihimong pagbabag sa Chinese Coast Guard niadtong Sabado.

“Patuloy pong pinag-aaralan ng Pangulo at ng Gabinete ang sitwasyon para makabuo po tayo ng makatwirang katugunan,” matud pa ni Coloma.

Human piita sa mga otoridad sa Chinese Coast Guard ang civilian nga barko nga naghatud og supply sa BRP Sierra Madre, wala papugong ang Armed Forces of the Philippine (AFP) og misakay sila og civilian fishing vessel aron ikahatud ang nahisgutang supply sa mga kauban nilang sundawo.

Nahitabo kini human miduso ang gobyerno sa Pilipinas og ‘memorial’ o summary of arguments sa UN Arbitral Tribunal sa The Hague batok sa China tungod sa padayon niining pangangkon sa South China Sea.

Samtang gisiguro usab ni Chinese President Xi Jinping nga walay mahitabong kagubot sa South China Sea gawas na lamang kun adunay manghagit kanila.

Image Credit: www.gmanetwork.com