DFA: 7 ka Nasud Gihataga’g Libreng Visa sa Pilipinas

Sugod niadtong Martes, gitugotan na ang pito ka nasud nga makasulod sa Pilipinas bisan walay visa.

Matud pa sa Department of Foreign Affairs (DFA), ang mga langyaw sa mga nasud sa Belize, Croatia, Kazakhstan, Kyrgyzstan, Tajikistan, Turkmenistan ug Uzbekistan gihatagan na sa gobyerno sa Pilipinas og pribilehiyo nga “visa-free” entry ug mahimong magpabilin sa nasud hangtud sa 30 ka adlaw.

Giingong gihatag ang maong pribilehiyo aron mas mapalambo pa ang turismo ug pamuhonan sa Pilipinas gikan sa maong mga nasud.

Matud pa ni DFA Undersecretary Rafael Seguis, nga tumong sa Department of Tourism (DOT) nga makab-ot sa ahensya ang 10 milyones nga foreign tourist arrivals sa tuig 2015.

Ang desisyon nga hatagan og visa free privilege ang 7 pa ka nasud naggikan sa inter-agency coordination sa Bureau of Immigration,
Department of Tourism, Department of Justice, Philippine Center on Transnational Crime, National Intelligence Coordinating Agency ug National Security Council.

Samtang gitangtang sa gobyerno ang Somalia sa listahan sa mga nasud nga gihatagan sa visa-free privilege ug gimanduan ang mga Somali nationals nga mo-apply sa ilang visa sa mga Embahada ug Konsulado sa Pilipinas sa ilang countries of origin o residencia sa pagbisita sa Pilipinas.

Ang mga nasud nga adunay visa-free privilege mahimong makuha ang pribilehiyo pinaagi sa pag-presentar sa ilang national passport nga balido og hangtud 6 ka bulan lakip na ang panahon sa ilang pagpabilin sa nasud ug return ticket diin sila naggikan o onward ticket sa sunod nga destinasyong nasud.

Ang mga nasud nga adunay visa-free privilege mikabat na sa 157 ug mahimo kining makita sa DFA website.