Devotee City 2016 Andam Na

Andam na ang Devotee City karong tuiga. Kini maoy gipasabot ni Besi Mayor Edgardo Labella nga maoy acting mayor karon atol sa Press Conference nga gipahigyon karong adlawa Enero 12 Martes didto sa nahimutangan sa Devotee City sa bakanting luna dapit sa Compania Maritima Building.

Gipadayag sa Besi Mayor nga ang kagamhanan ning dakbayan uban ni elected Mayor Michael Rama padayon nga gipalambo ang Devotee City aron sa pag-atiman sa mga deboto ni Senyor Santo Niño nga walay kapuy-an atol sa pagsaulog sa Sinulog.

Gipasalamatan usab niini ang tanan nga kanunayng mitabang alang sa tinuig nga kalihokan hilabina ang mga sponsors ug stakeholders.

Naglakip sa mga sponsors ug stakeholders ang 2Go Group Incorporated, Jollibee Foods Corporation, Philippine Long Distance Telephone Company, Visayan Electric Company, Metropolitan Cebu Water District, Julies Franchise Corporation, Tridarma Marketing Corporation (Kopiko ug Energen), Selecta Ice Cream, Globe Telecom, Association of Barangay Council, Barangay’s Ermita, San Roque, ug Santo Niño, Cebu City Police Office, Cebu City Fire Department ug ang 22 ka departamento sa Cebu City Government.

Atol sa kalihokan, mipakita usab sa ilang talento sa pagsayaw ang mga Mascots sa Julies Franchise Corporation nga silang Tita Julie ug Pandisal Kid, lakip na silang Jollibee, Hetty, Twirlie, Popo ug Yum sa Jollibee Foods Corporation nga milingaw sa tanan.

Samtang ang dakbayan nag-andam sa gibana-banang kapin sa Tres Mil ka mga deboto nga buot mopuyo sa Devotee City. Lakip sa gi-andam ang itanyag nga mga serbisyo sama sa libreng kapuy-an, kaligoan, lutoan, koneksyon sa internet, medikal nga serbisyo, matag gabii nga kalingawan, Misa, Kompisal, ug libreng tubig ug kuryente ug daghan pang uban.

Kinahanglan lamang ipakita ang ticket sa bus o barko aron makapuyo ug makabenepisyo sa Devotee City, ug nagikan sa Danao City pataas sa amihanang bahin sa probinsya sa Sugbo ug gikan sa Carcar City pataas sa habagatang bahin, lakip na usab ang mga deboto gikan sa mga kasilinganang Islang lugar ning dakbayan.

Giawhag usab ang mga deboto nga motuman sa mga lagda kon house rules sa Devotee City management sama sa dili pagdala ug mga hinagiban, pusil, ilimnong makahubog, pagsugal ug uban pa.

Gihingusgan usab sa dakbayan ang kahapsay ug seguridad sa Devotee City diin mopatrolya ang mga kapolisan ug barangay tanods aron kini mapatuman.

Dugang pa, pormal nga ablihan ang Devotee City karong Enero 15 Biyernes nga mao usab ang adlaw nga pwede na mopuyo ang mga deboto. Molungtad ang operasyon sa Devotee City ug tulo ka adlaw gikan sa pag-abli niini. (Cebu City Public Information Office PIO/Greggy Jiggs P. Senados)