DEPW Gidid-an sa Pag-Inspeksyon sa Palace of Justice

Gidid-an ni Mayor Michael Rama ang mga kawani sa Department of Engineering and Public Works (DEPW) nga mo-inspection pag-usab sa Palace of Justice Building nga nahimutang luyo nga bahin sa Kapitolyo.

Ang pamahayag sa mayor iyang giluwatan human si Regional Trial Court (RTC) Executive Judge Soliver Peras nasuko nga gisusi sa mga inspectors sa DEPW ang Palace of Justice kaniadtong miaging Huwebes nga wala mananghid kaniya.

Si Judge Peras mipahunong sa mga kawani sa DEPW sa paghimo og subli nga inspection sa Palace of Justice tungod kay wala sila mananghid sa Supreme Court o kaha ngadto kaniya nga maoy executive judge.

Gipasabot ni City Engineer Kenneth Carmelita Enriquez nga ang ilang gihimo gipasubay sa awhag sa City Council nga ipasusi pag-usab ang Palace of Justice nga sayo pa ilang gideklarar nga dili na maayong gamiton human makasinati og pagpangliki tungod sa linog.

Ang mayor miingon nga ang mga kawani sa DEPW mideklarar na nga peligroso na gamiton ang Palace of Justice tungod sa dagku nga mga liki sa mga semento.

Matud ni Mayor Rama nga dili na angay’ng himoan og subli nga inspection ang Palace of Justice Building kay ang paghimo’g laing inspection dili kini makapalig-on sa building.

Si Rama miingon nga bisan og mananghid pa ang mga kawani sa DEPW kang Peras aron susihon pag-usab ang building dili kini makapausab sa nahauna nila nga findings.

Apan si Konsehal Sisinio Andales nga usa ka abogado og padayong nanglaban og mga kaso sa hukmanan miingon nga sa iyang tan-aw ang pagpangliki sa bung-bong sa Palace of Justice wala kini makaapekto sa kalig-on sa building.

Pagka karon wala na gayud gamita pa ang Palace of Justice kay gani ang mga huwes adto na maghimo’g temporary courts sa usa ka dakung building sa North Reclamation Area (NRA) sakop sa dakbayan sa Mandaue.

Apan sanglit wala pa man maandam ang building nga himoon nga temporaryo nga hukmanan, daghang mga kaso ang nalangan sa paghusay og resulta mosamot kadugay ang pag-estar sa usa ka binilanggo sa prisohan.