DepEd: Mga Mograduwar Wala Pugsa Pagsul-ob og Toga

Gitataw sa Department of Education (DepEd) nga wala pugsa ang mga motapos sa elementarya ug high school nga magsul-ob og toga sa graduation.

Matud pa ni Assistant Sec. Tonisito Umali nga usa nila ka pamaagi nga himuong yano lamang ang graduation rites sa mga pampublikong tunghaan, giingong imbes nga toga, mahimong isul-ob sa mga mograduwar ang regular nga uniporme sa graduation.

Dugang pa ni Umali, wala usay angay huna-hunaong bayad ang mga ginikanan sa graduation tungod kay may gipatuman man nga “no collection
policy” ang DepEd.

Giingong bisan gitugotan sa buhatan ang Parents-Teachers Association (PTA) nga mangolekta og pundo, apan dili kini pinugsanay.

Mipasidaan usab si Umali nga gidili ang pagrenta o pangabang og lugar sa gawas sa pampublikong tunghaan alang sa kalihokan sa graduation.

Kun adunay gustong moreklamo kabahin niini, mahimong motawag sa nasudnong buhatan sa DedEd sa numero 633-1942 ug 636-1663 o mo-text lang sa 0919-4560027.

Gipasalig usab ni Umali, nga bisan dili magpaila ang moreklamo, hatagan nila kini dayon og pagtagand ug aksyonan dayon sa buhatan.