DepEd Andam Mo-Edukar sa mga Binilanggo

●Ang pag-edukar sa mga piniriso gipaagi sa Alternative Learning System (ALS) nga una nang gipatuman sa mga pampublikong tulunghaan.

Sa pagbukas sa klase karong buwana, ang Department of Education (DepEd)-7 andam usab alang sa paghatag og edukasyon
niadtong anaa sa prisohan dinhi sa Central Visayas.

Sumala ni DepEd-7 Regional Director Carmelita Dulangon nga ang education program alang sa mga piniriso gipaagi sa Alternative Learning System (ALS), nga una nang gipatuman sa mga pampublikong tulunghaan alang sa mga tawo nga taas na og pangidaron ug gustong makahuman sa ilang pag-eskwela.

Miingon si Dulangon nga ning tuiga may kapin sa 300 ka mga magtutudlo gikan sa Central ug Eastern Visayas ang ilang gipaubos sa training ug orientation alang sa pagpalapad pa sa ALS.

Dinhi sa Sugbo, si Dulangon nagkanayon nga ang mga magtutudlo sa ALS moadto sa prisohan sa syudad sa Sugbo, Talisay, Toledo ug ingon man sa Lapulapu aron manudlo sa mga binilanggo.

Midugang si Dulangon nga gawas sa pagkat-on sa pagbasa ug pagsulat, ang mga piniriso tudloan usab sa pipila ka mga kaalam sama sa welding ug uban pa “aron makagawas na gani (sila), aduna na silay makamahoan nga magamit nila alang sa pagbag-o nila sa kinabuhi, matud pa ni Dulangon.