DepEd 7: US Army, AFP Motukod og Classroom

Gibutyag sa Department of Education (DepEd)-7 nga ang mga sundalo sa Estados Unidos uban ang mga sundalo sa nasud sa Pilipinas gitakdang motukod og mga classroom dinhi sa lalawigan sa Sugbo sugod sa tunga-tungang bahin ning tuig 2014.

Sumala ni DepEd-7 Regional Director Carmelita Dulangon nga ang pagtinabangay sa US Army ug sa Armed Forces of the Philippines (AFP) sa pagtukod og mga lawak klasehanan kabahin sa ilang Balikatan Exercise.

Gawas sa US ug Philippine Army, si Dulangon nagkanayon nga ang Ramon Aboitiz Foundation Inc. (RAFI) ug ubang mga non-government organization (NGO) mopadayon usab sa pagtabang sa DepEd pinaagi gihapon sa pagtukod og dugang mga classroom dinhi sa lalawigan ug sa ubang probinsiya sa Tungang kabisay-an.

Si Dulangon midugang nga gibanabanang mikabat sa 60 ka mga bag-ong classroom ang tukuron sa RAFI dinhi sa lalawigan samtang ayuhon usab ang laing kapin sa 60 ka mga classroom nga naguba sa bagyong Yolanda didto sa aminahanang bahin sa lalawigan sa Sugbo.

Hatagan usab niini og ayuda ang ubang mga probinsya sa Tunga’ng bahin sa Kabisay-an nga apektado usab sa mga kalamidad.

Subay niini, si Dulangon mapasalamaton kaayo sa armadong kusog sa Estadus Unidos ug sa Pilipinas tungod kay ang ayoda niini dako kaayo og ikatabang sa lapad nga kakulangon sa mga classroom karon ilabina sa mga lugar nga gikuso-kuso sa bagyo.