DepEd 7 Nasagmuyo sa Isyu nga ‘Panguwarta’ sa Brigada Eskwela

●Ginikanan misusi sa DepEd kun may pagtugot ba ang PTA officials nga makapangayo og tag P50 isip donasyon, bugti sa dili pag-apil sa Brigada Eskwela.

Nasagmuyo ang kadagkuan sa Department of Education (DepEd)-7 sa giingong pagpangwarta atol sa gipahigayon nga Brigada Eskwela sa mga tulunghaan niining pipila ka semana sa dili pa buksan ang klase karong Hunyo ning tuiga.

Kini human ipadangat sa pipila ka mga ginikanan sa barangay Tuyan, syudad sa Naga ang ilang pangutana kun gitugotan ba sa DepEd-7 ang mga PTA officials nga makapangayo og P50 sa matag ginikanan isip donasyon alang sa pintal bugti sa dili nila pag-apil sa Brigada Eskwela.

Ang mga ginikanang hingtungdan nahadlok nga piiton ang ilang mga anak sa higayon nga masayran sila nga moreklamo sa buhatan sa DepEd.

Ilang giisip nga kini usa ka matang sa korapsyon kay gipangwartahan sila.

Ang maong mga ginikanan kinsa wala magpaila miingon nga napugos sila sa paghatag og P50 kay wala man silay panahon sa pagsalmot sa trabaho sa pagpangayo ug pagpanglimpyo sa mga classroom.

Pipila sa hinungdan niini mao ang kalisud sa ilang panginabuhi busa giuna nila ang pagbantay sa ginagmay nilang mga tinda ug ubang matang sa panginabuhi nga kakuhaan nila og pagkaon matag adlaw.

Ang Public Information Officer sa DepEd-7 Dr. Clara Rebecca Falcone miklaro nga ang katuyoan sa Brigada Eskwela mao nga magtambayayong ang mga ginikanan sa mga tinun-an ug ang mga magtutudlo sa paglimpyo ug pag-ayo sa mga guba sa classroom sa mga tulunghaan aron hingpit na nga makasugod og klase ang mga kabaataan sa Hunyo 2, 2014 , ang unang adlaw sa pagbukas sa klase sa school year 2014-2015.

Sumala pa ni Falcone nga gitugot sa DepEd ang paghatag og donasyon alang sa pagpamalit og pintal apan gikinahanglan nga kini bolantaryo nga paghatag ug dili ipaagi sa pamugos isip bugti sa dili pag-apil sa pagpanglimpyo.

Nasayran nga ang gastohanan sa pintal ug pag-repair sa guba sa nga classroom kabahin sa matag bulan nga Maintenance and Other Operating Expenses (MOOE) sa matag eskwelahan.

Subay niini, si Falcone nagkanayon nga angayan nga ang division superintendent sa DepEd sa syudad sa Naga mosusi ug mobadlong sa mga opisyal sa PTA sa Tuyan Central Elementary School sa syudad sa Naga kay makadaot kini sa dungog sa Brigada Eskwela.