DENR7 Moimbistigar sa Gipamutol nga Pagatpat

●DENR-7 miimbistigar sa taho kalabot sa pagpamutol sa mga pagatpat sulod sa Banacon Island Mangrove Forest (BIMF) sa
Getafe, Bohol.

Ang Department of Environment and Natural Resources (DENR)-7 miimbistigar sa taho kalabot sa ilegal nga pagpamutol sa mga punoan sa pagatpat didto sa Banacon Island Mangrove Forest (BIMF) sa Getafe, Bohol.

Si DENR-7 Regional Executive Director Isabelo Montejo nagkanayon nga iyang giumol ang usa ka grupo sa pag-imbestigar sa ilegal nga pagpamutol sa maong mga tanom sulod sa Getafe Mangrove Swamp Forest Reserved and Wilderness Area (GMSFRWA).

Ang naasoy nga investigating team sa DENR-7 gipangulohan ni Talibon, Bohol Community Environment and Natural Resources Officer (CENRO) Elpidio Palaca.

Subling gipasabot ni Montejo nga ang pagdili sa pagputol og kahoy ilabina pagatpat gibase sa Presidential Proclamation 2146 nga gipagawas niadtong tuig 1982 ug Republic Act Number 7161 nga nag-imponer og “national ban” sa pagputol og punoan sa pagatpat uban ang tukmang silot.

Matud pa ni Montejo nga ang mangrove forest sa kaprobinsiyahan sa nasud makatabang kaayo sa pagpugong sa tsunami ug storm surge nga dala sa linog ug bagyo ug ingon makapugong sa epekto sa climate change.

Dugang pa niya nga hayan maapektohan ang eco-tourism sa Bohol tungod sa ilegal nga pagpamutol sa pagatpatan niini hinungdan nga ilang gitinguha nga mailhan ang responsabli ug kapasakaan dayon og kaso sa korte.