DENR7-MGB Mihangyo ni Davide: Ipahunong ang ‘Small-Scale Gold Mining’ sa Toledo City

●Bisan adunay na Cease and Desist Order, nagpadayon ang gikatahong illegal nga gold mining sa maong lugar nga niabot nag usa ka hektarya ang gilapdon sa operasyon, matud pa sa MGB.

Gihangyo sa Mines and Geo-sciences Bureau (MGB) ubos sa Department of Environment and Natural Resources (DENR) 7 si Gobernador Hilario Davide III nga ipahunong ang gikatahong illegal nga ‘small-scale gold mining’ sa Sitio Boswang, Barangay Cambang-og, Toledo City.

Si OIC-Mining Operation Officer Raul Laput ,mihimo sa maong hangyo pinaagi sa iyang duha ka pahina nga sulat hangyo sa gobernador.

Namatud-an ni Laput pinaagi sa iyang mga kawani nga gitahasan sa pag-imbistigar sa minahan, nga nagpadayon ang illegal nga gold mining sa mga molupyo sa maong lugar hangtud niining higayona.

Dugang pa ni Laput nga anaa na sa usa ka hektarya ang gilapdon sa minahan sa luna nga nahilakip sa Mineral Production Sharing Agreement sa Atlas Consolidated Mining & Development Corporation (ACMDC), bisan aduna na kini Cease and Desist Order (CDO) nga giluwat sa MGB sa milabayng tuig.

Ang MGB miluwat og Cease and Desist Order (CDO) sa pagmina sa barangay Cambang-og niadtong milabayng tuig.

Hinuon gitataw ni Laput nga ang maong lugar posibling madeklarar isip People’s Small-Scale Mining Area (Minahang Pampamilya) ubos sa Republic Act No. 7076 kun makakompleto sila sa gikinahanglkang mga papeles o lisensya.

Mintras tanto nga wala pa silay lisensya, si Laput nihangyo ngadto sa buhatan sa gobernador, sa kagamhanan sa syudad sa Toledo ug sa barangay Cambang-og lakip na sa kapolisan, sa pagpahunong sa naasoy nga gold mining activities sa maong lugar sa labing dali nga panahon.

Ang maong hangyo ni Laput gipadangat pud ngadto sa buhatan nila ni Toledo City Mayor Henry “Sonny” Osmeña, Cambang-og barangay kapitan Timoteo Largo, ug ang buhatan sa director sa Cebu Provincial Police Office ug Toledo City Police Office Chief, C/Insp. Machael Bastes.