DENR Supak sa Gipangayo’ng TRO

Gisupak sa Department of Environment and Natural Resources (DENR)-7 ang gipangayo nga Temporary Restraining Order (TRO) ug injunction sa mayor ug ubang mga opisyal sa Argao kalabot sa kasong illegal nga pagputol og kahoy sa forest protected area sa DENR sa lungsod sa Argao.

Sa walo ka pahina nga ” Opposition to the issuance of a Temporary Restraining Order” nga motion ngadto sa korte, sila si DENR Sec. Ramon Paje, DENR-7 Regional Executive Director Isabelo Montejo ug ubang mga opisyal sa DENR-7 mitumbok nga ang lower court walay gahum sa pagluwat og TRO aron pugngan ang ahensiya sa gobyerno sa pagpatuman sa environmental laws ug sa pagprotehir sa kalikopan.

Gidili kini ubos sa Section 10, Rule 2 sa Rules of Procedure for Environmental Cases, Section 1 sa Presidential Decree (P.D.) No. 605 ug sa Section 1 sa P.D. No. 1818.

Si Paje, Montejo ug kaubanan nagkanayon nga ubos sa Section 10, Rule 2 sa Rules of Procedure for Environmental Cases nga bugtong ang Korte Suprema lamang ang maka-isyu ug TRO o writ of preliminary injunction batok sa “lawful action of government agencies.”

Sa Section 1 sa P.D. No. 605 usab nagtumbok nga walay bisan usa ka korte nga may hurisdiksyon sa pag-isyu og restraining order o injunctions labot sa pagdis-aproba, paglangkat o pagsuspenso sa lisensiya sa exploration o development sa natural resources.

Ug sa Section 1 sa P.D. No. 1818 nagtumbok usab nga walay korte nga may hurisdiksyon sa pag-isyu og restraining order o injunction batok sa mga kaso o kontrobersiya nga naglambigit sa ” forest or other natural resource development project of the government.”

Gani gipahibawo niini nga ang Korte Suprema mipagawas sa Circular No. 2-91 nga nagmando sa tanang mga huwes sa pagtuman sa naasoy nga balaod.

Subay niini, si Paje, Montejo ug mga kaubanan miawhag sa korte nga ibasura ang petisyon ni Argao mayor Edsel Galeos ug ubang mga opisyal sa Argao nga kasamtangan nangayo og TRO ug injunction kay wala man makalapas o makababag ang ilang kamandoan sa police power sa LGU sa Argao.

Kini tungod kay ang pagputol og kahoy sa timeberland ug sa sulod sa National Greening Program sa DENR alang sa pagpatuman sa propose road system sa Argao dakong kalapasan sa moratorium sa pagputol ug pag-harvest sa kahoy, ilabina sa timberland area o protected areas base sa Section 68 sa P.D.No. 705 nga mas naila nga Revised Forestry Code of the Philippines nga gimandar pinaagi sa Executive Order No. 277.