DENR, NBI Magtagbo

Tigum pakig-alayon tali sa duha ka ahensya sa gobyerno aron paspasan ang pagpangita sa nangahanaw nga mga kahoy sa dalan Osmeña blvd.

Giaghat sa Department of Environment and Natural Resources (DENR)-7 ang mga imbestigador sa National Bureau of Investigation (NBI)-7 nga makigtagbo sa Regional Anti-Illegal Logging Task Force (RAILTF) sa Central Visayas aron hingusgan ang pagpangita sa nahanaw nga mga kahoy gikan sa center island sa Don Sergio Osmeña Boulevard ning syudad sa Sugbo.

Sumala pa ni DENR-7 Executive Director Dr. Isabelo Montejo sa iyang sulat nga gipadala ngadto kang NBI-7 Regional Director Max Salvador nga importante kaayo ang pagpakig-alayon sa duha ka puwersa alang sa mas dali nga pagpangita sa mga kahoy nga nangahanaw sa naasoy nga dalan niadtong milabay nga bulan.

Gipahibawo ni Montejo nga ang coordination meeting tali sa RAILTF sa Central Visayas ug sa NBI-7 himuon karong Mayo 15, 2014 sa alas 2:00 ang takna sa hapon didto sa Conference Hall, New Administration Building sa DENR-7 compound, Greenplains Subdivision, Banilad.

Naglaum hinuon si Montejo nga dili balibaran ni NBI-7 Regional Director Salvador ang naasoy nga coordiantion meeting.