DENR Miawhag sa Publiko Pagpareserbar sa Kalikopan

● Gihingusgan sa DENR ang pag-awhag sa tanan nga molihok ug paglikay sa nasinating kadaut mugna sa climate change.

Ang Department of Environment and Natural Resources (DENR)-7 miawhag sa publiko nga mosalmot sa ilang kawsa pagprotehir ug pagpreserbar sa kalikopan aron dili na masinatian pag-usab ang mga katalagman sama sa super typhoon nga Yolanda sa miaging tuig.

Sa kasaulogan sa world environment day (WED) sa miaging adlaw uban sa tema nga “Raise your voice, not the sea level,” si DENR 7 Regional Executive Director Dr. Isabelo R. Montejo miingon nga kun magpadayon sa pagpabaya ang mga tawo sa kalikopan, posibling mas grabe pa unya ang mga katalagman ang mahitabo tungod sa nagkagrabing epekto sa climate change.

“We have been making more efforts in order to mitigate the impacts of climate change through our national greening program (NGP), geohazards mapping and assessment, biodiversity conservation but we feel much more needs are to be done with our partners and other stakeholders,“ sigon pa ni Montejo.

Matud pa ni Montejo nga ang hulga sa ‘global warming’ tinuod gayud base sa report sa Intergovernmental Panel on Climate bahin sa Climate Change nga kun magpadayon ang greenhouse gases, moduble ang pagsaka sa global temperature gikan sa 3.5 hangtud sa 4 degree centigrade sa umaabot nga 21st century.

Si Montejo nagkanayon nga sa wala pa moabut ang bagyong Yolanda ang ilang buhatan mipatuman na og mga programa nga makapungong o makapaminus sa pagkalas sa mga kinabuhi tungod sa grabing epekto sa dautang panahon nga resulta sa climate change.

Apan iyang gitataw nga mas magmalampuson gyud unta kaayo ang ilang gipatuman nga programa kun gituman pa sa katawhan ang ilang mga pasidaan.

Pipila sa maong pasidaan mao ang pagpananom og kahoy sa kabungtoran ug kapatagan lakip na ang kabaybayonan.

Gumikan sa nahitabo, gihingusgan karon sa DENR ang pag-awhag sa tanan nga molihok na ug dili angay magpaabot nga may kusog pang bagyo ug linog nga moabot nga mugna sa climate change.

Apan kun moabot man gyud ang grabeng katalagman, kinahanglang wala na untay kinabuhing maangin gumikan sa pagpabaya, matud pa ni Montejo.

Image Credit: blogs.scientificamerican.com