DENR Miawhag sa Publiko: Langob Protektahan

●Daghang minerales sa langob ang gikatahong gipanguha ug gipamaligya sa mapahimuslanong mga tawo, nga usa ka dakong kalapasan sa balaod.

Ang Department of Environment and Natural Resources (DENR) 7 nanghingusog sa pagpreserbar sa mga langob dinhi sa lalawigan sa Sugbu ug sa ubang probinsiya sa Central Visayas.

Kini pinaagi sa pag-awhag sa publiko nga protektahan ang mga langob tungod kay anaa sa maong mga lugar ang mga espesyal nga pormal sa mga minerales nga may talagsaong matang.

Si DENR-7 Regional Executive Director Dr. Isabelo R. Montejo nagkanayon nga ang maong lakang gihimo tungod usab sa nadawat nga report nga daghang mga minerales sa sulod sa langob ang gipanguha ug gipamaligya sa mapahimuslanong mga tawo, nga usa ka dakong kalapsan sa balaod.

“The protection and conservation of caves is mandated under Republic Act 9072, otherwise known as the “National Caves and Cave Resources Management and Protection Act,” sigon pa ni Montejo.

Si Montejo mitug-an nga ilang kaabag sa maong lakang mao ang cave coordinating agencies, National Museum, National Historical Institute, Department of Tourism ug Local Government Units (LGU) nga nahimutangan sa maong mga langob.

Dugang pa ni Montejo nga sigon sa ilang nakuha nga datus gikan sa Protected Areas, Wildlife and Coastal Zone Management Services, may 145 ka mga langob ang natala ug nadiskobrehan dinhi sa Central Visayas ug gani may mapa na kini alang sa hugot nga pagmonitor sa ilang buhatan.

Image Credit: www.world66.com