DENR Magsaulog sa Environment Month karong Hunyo

Gibutyag sa Department of Environment and Natural Resource (DENR)-7 nga ilang saulugon ang Philippine Environment Month karong Hunyo nga may tema nga “Raise your voice, not the sea level.”

Suma ni DENR-7 Regional Executive Director Isabelo Montejo nga ang maong kasaulugan agi og suporta sa United Nations (UN) kinsa miila sa tuig 2014 nga International year of Small Island Developing States (SIDS). Usa sa tinguha niini mao ang pagpakabana sa katawhan aron kaprotehian ang mga gagmay nga isla sa kadagatan.

Matud pa ni Montejo nga sa unang adlaw sa Hunyo, ipahigayon ang usa ka run for the environment nga gitawag og “Dagan para sa Kalikupan” nga magsugod sa alas 5:00 sa buntang didto sa Parkmal, Mandaue city nga pagasalmotan sa Cebu Climate Change Association Inc. diin ang matag mosalmot magdala og usa ka seedling aron itanom.

Sa Hunyo 5 nga giisip nga world environment day, ipahigayon ang dungan nga mangrove planting o ang pagpananum og mga pagatpat sa 14 ka mga coastal areas sa upat ka probinsiya sa Central Visayas.

Ipahigayon usab ang Environmental Stewardship Forum alang sa pag-promote og konkretong aksyon sa mga environmental issues didto sa Negros Oriental State University-Guihulngan City Campus; Bohol Island Sate University ug Cebu Technological University, Argao Campus sa Hunyo 17 hangtud sa Hunyo 19 ning tuiga.