DENR, LTO Mag-alayon sa Smoke Emission Test

●Kini aron makabaton og limpyo nga hangin pinaagi sa pagminus sa polusyon sa Sugbu ug mga lugar sa Central Visayas.

Gipahibawo sa Department of Environment and Natural Resources (DENR)-7 nga ang ilang Environmental Management Bureau (EMB) makig-alayon sa Land Transportation Office (LTO)-7 alang sa pagpahigayon og subsob nga smoke emission test sa mga sakyanan nga nagdagan sa nagkadaiyang dagkong dalan dinhi sa Metro Cebu Area.

Si DENR-7 Regional Executive Director Isabelo Montejo miingon nga ang maong kalihukan tipik ug kabahin sa pagsaulog karon sa DENR sa tibuok nasud sa environment month niining bulan sa Hunyo.

Matud pa ni Montejo nga ang EMB-7 mouban sa LTO sa pagpahigayon og roadside random emission testing matag semana sa kadalanan nga sagad agian sa daghang mga pribado ug pampublikong sakyanan.

Kini aron hingusgan ang pagbaton og limpyo nga hangin pinaagi sa pagpaminus sa polusyon sa Sugbu ug ubang mga lugar sa Central Visayas nga sagad makuha gikan sa mga aso nga ibugwak sa mga sakyanan nga nagdagan.

Gawas sa roadside smoke emission test, gitug-an usab ni Montejo nga ang ilang buhatan mopahigayon usab og pagpanglimpyo sa coastal areas ug ingon man sa mga kasapaan.

Gani ilang ipahigayon sa Hunyo 22 ang 2nd Cebu Run for the rivers aron matabangan ang pagpanglimpyo sa pipila ka mga kasapaan. Kauban sa maong kalihukan sa DENR-7 ug EMB-7 mao ang mga Cebu Chamber of Commerce and Industry (CCCI).

Dugang pa ni Montejo nga sa Hunyo 25 usab pagahimuon sa DENR-7 ug sa tanang mga sangang buhatan niini ang region wide simultaneous tree planting activity agi og pagtamod sa Arbor Day Celebration sa maong adlaw.

“This is to focus public attention and encourage governments, organizations, communities to actively engage in activities that address challenges of our fragile environment,” sigon pa ni Montejo.