DENR 7 Miluwat og CDO Batok Mayor sa Argao

Gipagawas na ang cease and desist order (CDO) sa Department of Environment and Natural Resources (DENR) 7 batok kang Arago mayor Edsel Galeos aron sa pagpahunong na sa gipanday nga Argao Sports and Recreation Center project sa sitio Candabong, Barangay Binlod, Argao, Cebu.

Matud pa ni Community Environment and Natural Resources (CENRO) officer-in-charge Flordeliza Geyrozaga nga ang iyang gibasehan sa pagluwat og CDO batok sa proyekto ni mayor Galeos mao ang pagbasura ni DENR-7 Regional Executive Director Isabelo Montejo sa “application for a tenure” sa maong proyekto.

Miingon si Geyrozaga nga usa sa bug-at nga hinungdan nga gibasura ang aplikasyon ni Galeos mao nga ang naasoy nga luna nga giturokan sa sports center usa ka “lowland timberland areas”.

Midugang si Geyrozaga nga si Montejo nagpadala og sulat ngadto kang mayor Galeos niadtong Mayo 14, 2014 nga nagpahibawo nga gibasura niini ang aplikasyon ni Galeos sa pagtukod og sports and recreation facilities nga nakapektar sa ubay-ubay nga mga punoan sa pagatpat.

Apan giingon nga wala tagda ni Galeos ang maong suwat kay gipadayon man niini ang iyang proyekto, sumala ni Geyrosaga. Iya kining nasuta sa gipahigayon niya nga occular inspection sa sa maong lugar sa miaging semana diin nasuta niya ang construction sa seawall ug pagbukas og karsada nga nakadaut sa mga kakahuyan sa maong dapit.

Busa gibaharan ni Geyrozaga ang mayor nga sa higayon nga supakon gihapon niini ang giluwat niya nga CDO, mapugos ang DENR-7 sa pagpasaka og tukmang kaso batok sa mayor.