DENR-7 Adunay 4 Milyones ka mga Seedling Alang sa Greening Program

Nakatigom na ang Department of Environment and Natural Resources (DENR)-7 og kapin sa 4.6 ka milyon ka seedling agi og pagtuman sa national greening program dinhi sa Central Visayas.

Sumala pa ni DENR-7 Regional Executive Director Dr. Isabelo Montejo nga ang ilang napatubo nga 4.6 million ka igtatanom nga lubangon, 42 porsyento lamang sa gi-target sa DENR-7 nga 11 ka milyon nga seedling production niining tuiga.

Si Montejo nagkanayon nga ilang gihingusgan ang maong programa aron malukop sa tanum ang mga kalungsoran ilabi na sa kabukiran aron kaminusan ang nasinating kainit karon ug kapugngan ang grabing pagbaha ug pagdahili sa yuta atol sa ting-ulan.

Iyang gitataw nga sa maong gidaghanon ang probinsiya sa Sugbo maoy labing daghan og giandam nga seedling sa nagkadaiyang matang sa kahoy nga mikabat na og 1,942,927 ang tanan.

Gisundan kini sa Bohol nga may 1,506,610 ka seedling; Negros Oriental 1,142,651, ug Siquijor province nga may 26, 500 ka seedling.

Giklaro usab ni Montejo nga ang maong programa nakatabang usab sa mga kabus kay sila man ang benepisaryo sa maong progama.

“Our forests are important in providing stable watershed function and nutrients, steady supply of food and shelter for wildlife, adequate supply of seeds and wildlings, protection from heavy rains and storms, windbreaker, prevention of flash floods and landslides and revival of biodiversity” dugang pa ni Montejo.