Demolisyon Nahunong, Sakop sa Demolition Team Nangawat

Sa ikaduhang adlaw sa demolisyon sa Sitio San Miguel, Barangay Apas, nasuspenso og tulo ka-oras ang gipahigayong pagguba sa mga balay sa dihang nasakpang nangawat ang duha ka-sakop sa demolition team.

Ang court sheriff na si Edilberto Suarin nimando sa paghunong sa demolisyon sa mga balay alas-11:00 sa buntag kagahapon human mapamatud-i na nangawat sa mga butang sulod sa gipanggubang balay ang sakop sa demolition team nga si Christian Abatol ug lain pang kauban nga nakaipsot.

Naaghat usab si Suarin pagsuspenso sa maong demolisyon nga gisugdan alas 8:30 kagahapon sa buntag sa dihang mireklamo si barangay kapitan Ramil Ayuman ug mga kaubanan sa City Hall nga gipangulohan ni Atty. Jade Ponce, ang executive assistant ni Mayor Michael Rama.

“Dako ang iyang tubagunon kung naa’y mangawala diha. He has to account his people; he should be responsible,” matud pa ni Ponce.

Gikataho nga samtang ang mga kaubanan na-busy pagguba sa mga balay, si Abatol ug ang usa ka-kauban niini misulod sa balay ni Vangie Adonay.

Nadakpan si Abatol ug nasakmitan og bag nga dunay sulod nga mga electric wire og cassette radio.

Napakyas hinuon ang kapulisan ug mga tanod sa pagdakop sa kauban ni Abatol nga maoy iyang gipasahan sa blower og plantsa sa buhok.

Si Adonay, usa ka-hairstylist, puwerting lagota human niya hisayri nga gipangawat ang iyang mga gamit sa parlor.

Ang pamilyang Adonay mipasaka dayon og kasong pagpangawat batok kang Abatol kinsa gitanggong karon sa Mabolo Police Station.

Image Credit: philstar.com