De los Santos, Tumulak Dili Angay Mabalaka

Klaro na nga sila si Konsehal Dave Tumulak ug Mary Ann delos Santos hatagan og executive functions ni Mayor Michael Rama nga makadumala gihapon sila sa health ug social services-related matters bisan ug wala sila hatagi’g komitiba sa konseho.

Grabeng pagkadismaya sa duha ka konsehal nga alyado sa Team Rama tungod kay bisan og gidiskutir pag-usab ang isyu nga wala paghatag kanila og komitiba sa konseho, apan ang mga konsehal nga alyado sa Bando Osmeña Pundok-Kauswagan (BOPK) mibarug g’yud nga sila dili hatagan og komitiba.

Sila si Tumulak ug Delos Santos parehong mi-deliver ug speech atul sa session kagahapon/Miyerkoles ug ilang gisaway pag-ayo ang gihimo sa ilang mga kauban nga konsehal nga mga alyado sa Bando Osmeña Pundok-Kauswagan (BOPK).

Si Delos Santos miingon nga daku g’yud ang iyang tinguha nga mao unta ang matudlo nga pangulo sa Committee on Health and Hospital Services kay gusto niya nga malamboon ang health services sa kabarangayan.

Matud ni Tumulak nga nakabatyag siya nga bisan og nahuman na ang init kaayo nga kampanya sa miaging eleksyon sa Mayo 13, apan nagpadayon pa ang “election fever” diha sa konseho sa dakbayan.

Gihimong sanglitanan ni Konsehal Delos Santos ang nahitabo sa Cebu Provincial Board diin ang tanang Board Members bisan og sila nasakop sa nagka-atbang nga partido parehong nahatagan og mga komitiba.

Matud ni Mayor Rama nga dili angay’ng mabalaka sila si Tumulak ug Delos Santos nga wala sila hatagi og komitiba sa konseho kay hatagan niya kini og katungod nga makasuperbisar sa social services ug health-related matters.