DAR, DPWH Mipatukod sa ‘Tulay Ng Pangulo’ Project sa Bohol

Ang Department of Agrarian Reform (DAR) kauban sa mga opisyal sa Department of Public Works and Highways (DPWH) nakigtagbo kang Bohol Governor Edgar Chatto alang sa pagpatukod sa ‘Tulay Ng Pangulo Para Sa Kaunlarang Pang-Agraryo’ (TPKP) Project didto sa Governor’s Mansion sa miaging semana.

Sumala ni DAR-7 Information Officer Rosanna Gay S. Visitacion, gipangunahan ni Undersecretary Felix Perry Villanueva ang mga opisyal sa DAR, kauban ni DAR 7 Regional Director Stephen Leonidas sa pagtambong sa nahisgutang panagtagbo.

Matud pa ni Visitacion nga gibutyag ni USEC Villanueva nga ang DAR nangandam nang daan og mga pre-fabricated kon ginama nang daan nga mga materyales alang sa taytayan sa TPKP.

Midugang si Visitacion nga tua nila ipundo ang maong mga materyales sa DPWH7 Regional Office Compound.

Midugang si Visitacion nga kini kabahin sa DAR Foreign Assisted Projects ubos sa Tulay Ng Pangulo Para Sa Kaunlarang Pang-Agraryo project nga gipaluyohan sa kagamhanan sa France.

Gibutyag usab ni Visitacion nga Si Director Leonidas mihisgot bahin sa hiniusang report sa DAR ug DPWH nga andam na nga pangilisan niini ang 12 ka mga taytayan nga nagusbat sa linog nga may gikusgong 7.2 magnitude niadtong Oktobre 15, 2013.

Ang maong ilisdanan nga mga taytayan nahimutang sa mga lungsod sa Antequera, Ubay, Guindulman, Sierra Bullones, Catigbian, ug Dagohoy.

Ang trabaho sa pagpagilis pangunahan sa DPWH nga abagan usab sa DAR ug sa Local Government sa Bohol.

Ang TPKP project naglangkob sa konstruksyon, instalasyon ug pagpatukod sa gitawag nga “universal bridges” nga nahimutang sa mga lugar nga nahisakop sa Agrarian Reform Communities ug nahisakop sa CARP.

Sa panagtagbo didto sa Governor’s Mansion gitambongan usab nila ni Assistant Regional Director Antonio Del Socorro ug Eddie Agac-ac, Provincial Agrarian Reform Program Officer II Grace Fua sa DAR Bohol, OIC PARPO I Eddie Maginsay, acting Chief of the Beneficiaries Development and Coordination Division Engr. Leonard Cagampang, ug uban pang mga opisyal sa DPWH nga gipangunahan ni Engr. Faustino de la Cruz sa DPWH Central Office, Engr. Felipe Mosquera, sa First District Engineering Office sa Bohol, ug Chief Planning Section Engr.II Maribel Baranggot.