‘Danyos sa Sunog Dul-an P7 Milyones’

Mikabat og P6.9 milyones ang kinatibuk-ang danyos sa ubay-ubay nga sunog nga miigo sa syudad sa Sugbo gikan sa bulan sa Enero hangtud na sa bulan sa Marso ning tuiga.

Mao kini ang gibutyag ni SFO2 Wendel Villanueva sa Cebu City Fire Department kinsa miingon nga ang Marso maoy labing daghan og sunog nga nahitabo dinhi sa dakbayan. Kini luyo sa kamatuoran nga gisaulog sa kagamhanan ang Fire Prevention Month sa maong buwan.

Gani gitug-an ni Villanueva nga base sa ilang natala nga record, 65 ka insidente sa sunog ang miulbo sulod sa 27 ka adlaw sa bulan lamang sa Marso.

Hinuon iyang gitataw nga kasagaran sa naasoy nga insidente sa sunog ning bulana mao ang pagkasunog sa kasagbutan.

Gitumbok niya nga ang labing dakong sunog sa syudad mao ang miigo sa barangay Lorega San Miguel nga nagbilin og P2.5 milyones nga danyos sa propiedad ug kapin sa 5 mil ka mga indibidwal ang nabiktima.

“Maiinit na kasi ang panahon kaya nadagdagan ang tsansa na madaling magkakaroon ng sunog” sigon pa Villnueva.