Dalan Kilid sa Sto. Niño, Pasirad-an

Ang kadagkoan sa Kaparian’g Agustino nga nagdumala sa Basilica del Santo Niño mihangyo sa mga opisyal sa dakbayan sa Sugbo nga sirad-an ang karsada kilid sa simbahan.

Si Rev. Fr. Harold Rentoria mibutyag nga nakapadala na sila og suwat-awhag ngadto sa kadagkoan sa City Traffic Operations Management (CITOM).

Ang CITOM hinuon mitugyan niini ngadto sa mga opisyal sa dakbayan sa Sugbo sanglit ang balaod naglatid man nga ang Konseho maoy adunay katungod pag-regulate sa mga karsada.

Matud ni Fr. Rentoria nga mopaspas ang pag-ayo nila sa nahugno nga “bell tower” sa Basilica kun walay mga sakyanan nga mag-agi-agi sa kilid nga karsada.

Ang bell tower sa simbahan nahugno diha nga ang Sugbo gitay-og sa kusog nga linog kaniadto’ng Oktobre 18 ug hangtud karon wala pa kasugdi sa pagtukod pagbalik.

Ang Osmeña Boulevard kilid sa Basilica del Santo Niño gisirad-an gikan kaniadto’ng semana Santa apan karon gipaagian na pagbalik sa mga sakyanan alang niadtong mopaingon sa dalan Colon.

Matud sa pari nga daghan ang nalipay sa pagsirado sa karsada kay dili kuyaw sa mga tawo nga moanha sa simbahan.

Si Bise Mayor Edgardo Labella misugyot unta og ordinansa nga sirad-an na g’yud sa hingpit ang karsada ug alang na lang kini sa mga tawo apan daghan ang wala makauyon.