Dalaga Hapit Malugos

Dalaga nga hingatulgon diriyot g’yud malugosi sa kawatan nga nakasulod nga wala niya mahibaw-i sa tindahan nga iyang gibantayan niadtong Dominggo, kagahapon.

Nakamatngon ang dalaga dihang nagtung-tong na kaniya ang kawatan ug nahukas na ang iyang underwear ug gipanghikap na ang pribado nga parte sa iyang kalawasan.

Nahitabo kini didto sa tindahan sa inahan sa dalaga sa Mandaue Public Market kaniadtong Domingo sa kaadlawon.

Swerte kaayo nga nahigmata ang 28-anyos nga babaye diha nga iyang namatngonan nga adunay bug-at nga mipatong kaniya samtang siya naghigda sa lantay.

Gipugngan lang sa MetroCebuNews ang ngalan sa dalaga aron dili siya maulawan ilabi na nga bag-o pa kini nga migradwar sa kolehiyo ug nagpangita pa og katrabahoan.

Ang dalaga abtik kaayo nga nakasinggit pagkamat-ngon niya nga usa ka tawo ang nagpatong kaniya.

Dali nga miresponde ang mga market guards nga nakadungog sa singgit sa dalaga ug ilang nakit-an ang usa ka lalaki nga paingon na unta nga moikyas gikan sa tindahan.

Ang lalaki nga nadakpan nailhan nga si Marcel Besabella, 26, molupyo sa Sitio Sta. Cruz, Barangay Guizo, dakbayan sa Mandaue ug gitugyan kini sa mga market guards ngadto sa kapolisan.

Si PO1 Jerome Lendio sa kapolisan sa Presento 1 sa Mandaue City Police Station (MCPO) miingon nga ang dalaga didto matulog sa tindahan gawas sa Mandaue City public market aron mabantayan ang ilang baligya.

Tungod sa kakapoy sa iyang lawas, maayo nga pagkahinanok sa dalaga ug wala makabantay dihang nakasulod si Besabella ka’ng kansang tumong mao ang pagpangawat.

Human masulod ni Besabella sa iyang bag ang P23,300 nga halin sa tindahan, lainlaing baligya, tablet, pahumot, lipstick ug uban pa, nakahuna-huna siya paglugos sa dalaga nga nahinanok sa lantay.

Matud ni PO1 Lendio nga ang dinakpan bisan og anaa na sulod sa bilanggoan nanghulga pa sa dalaga nga iyang patyon kun makagawas kini sa bilanggoan.