Dakbayan sa Sugbo Nanawat na ug mga Aplikante sa Summer Job

(Cebu City Public Information Office) — Gisugdan na sa kagamhanan ning dakbayan nga gipangulohan ni Mayor Michael L Rama pinaagi sa Department of Manpower Development and Placement kon DMDP ang pagpanawat og mga aplikante alang sa summer job.

Ang programa nga mas nailhang “Special Program for the Employment of Students” kon SPES adunay 1,225 ka mga slots o bakanting posisyon nga gitagana alang karong tuiga.

Abli ang maong programa ngadto sa mga Out-of-School Youth kon OSY nga gustong maka-eskwela og sa mga estudyante nga nagpangidaron ug 15-25 anyos. Gikinahanglan lamang nga mopasa sa ilang Biodata, SPES application, Barangay Clearance, Endorsement gikan sa usa lamang sa mga opisyales ning dakbayan, og Income Tax Return kon ITR sa ilang ginikanan nga dili momenus ug Php112,000 ang kita matag tuig subay sa ‘threshold’ nga gideklara sa National Economic Development Authority kon NEDA nga ubos sa ‘Family below poverty line.’

Sa pakighinabi sa BARUGG News kang Dave Michael Sereno, ang SPES Coordinator, gibutyag niini nga ang aplikasyon isumetir ngadto sa buhatan sa DMDP nga anaa nahimutang sa 2nd floor sa Ramos Multipurpose Building, Barangay Cogon Ramos ning syudad.

Dugang gipasabot ni Sereno nga ang mga makapasar sa eksaminasyon ug interview nga ipahigayon sa buhatan sa DMDP maoy mahatagan og oportunidad nga makatrabaho sa Cebu City Hall karong bakasyon o summer.

Tumong ug katuyoan sa programa nga giabagan sa Department of Labor and Employment kon DOLE mao ang pagtabang sa mga OSY ug mga estudyante hilabina sa gastohan sa ilang pag-eskwela.

Ang mga madawat nga mga aplikante bahinon sa tulo ka grupo diin motrabaho sila sa mga nagkadaiyang buhatan sa Cebu City Hall ug mga barangay. Magsugod ug trabaho ang mga madawat karong Abril 13 hangtod Mayo 11 alang sa 425 nga unang hut-ong sa SPES; Mayo 13 hangtod Hunyo 9 alang sa 400 nga ikaduhang hut-ong; ug Hunyo 22 hangtod Hulyo 17 alang sa 400 nga ikatulong hut-ong sa SPES nga gitagana alang sa mga OSY.

Motrabaho ang mga summer jobbers Lunes hangtod sa Biyernes sa alas-8 sa buntag hangtod sa alas-5 sa hapon ug makadawat kini sa minimum nga sweldo. Ang dakbayan sa Sugbo migahin ug P5 Milyones alang sa pagbayad sa 60 porsyento sa sweldo sa mga Summer Jobbers ug ang 40 porsyento maoy bayran usab sa DOLE.

Alang sa dugang kasayuran mamahimong mobisita sa buhatan sa DMDP o motawag sa Telephone numbers 253–9212 ug 254–4348. (Cebu City Public Information Office PIO/Greggy Jiggs P. Senados)