Dakbayan sa Sugbo Mibayad na sa JBIC og P202 Milyones

Ang dakbayan sa Sugbo mibayad na niadtong Miyerkoles og P202 milyones ngadto sa Japan Bank for International Cooperation (JBIC) isip ikaduha nga bayad karong tuiga sa utang sa pag-ugmad sa South Reclamation Project (SRP).

Ang 295-hektareyas nga SRP gihinganlan na karon og South Road Properties nga kon ibaligya ang kinatibuk-an nga kayutaan mohalin og bilyon-bilyon ka pesos nga subra kaayo sa nagpabilin pa nga utang nga moabot pa’g kapin sa P3 Bilyones.

Si City Treasurer Diwa Cuevas miingon nga ang labaw sa katunga sa ilang gibayran ngadto sa JBIC alang ra sa “interest” sa “principal amount” sa huwam nga salapi.

Ang pagbayad gihimo rang direkta nga ibanon sa kuwarta sa dakbayan diha sa Land Bank of the Philippines (LBP). Kada tuig, ang dakbayan mobayad matag Pebrero 20 ug Agosto 20 ug ang kantidad anaa g’yud sa P200 milyones.

Adunay mga konsehal nga mipabor nga ang dakbayan mobaligya na og kayutaan sa SRP aron nga ibayad sa utang sa JBIC, apan si Kanhi Kongresista Tomas Osmeña miinsister nga dili pa karon ang tukma nga panahon nga ibaligya ang kayutaan sa SRP.