Dakbayan sa Sugbo, Adunay Dugang Ambulansya

Ang kagamhanan sa dakbayan sa Sugbo nakaangkon na usab og dugang tulo ka bag-ong ambulansya nga idestino sa pipila ka barangay aron pagpalambo sa serbisyo ngadto sa publiko nga nanginahanglang dad-on dayon sa ospital.

Ang tulo ka brand new nga ambulansya gitugyan kagahapon sa Toyota Motors ngadto sa dakbayan sa Sugbo. Pagka karon miabot na og siyam ka ambulansya ang napanag-iya sa dakbayan sa Sugbo ug ang kadaghanan niini anaa idestino sa Basak-Pardo Emergency Response.

Si Konsehal Dave Tumulak nga maoy nagmugna sa BPER miingon nga ang duha sa brand new nga mga ambulansya adto ni idestino sa Basak-Pardo Emergency Response ug ang usa adto sa Barangay Labangon.

Matud ni Tumulak nga ang duha sa mga ginamit na nga ambulansya sa BPER ihatag usab nila sa Barangay Apas ug sa Sambag 2 aron ila kini nga kapahimuslan.

Si Tumulak miingon nga nahinangop kaayo siya nga nadugangan ang ilang mga ambulansya aron takus kini nga makaresponde sa panginahanglan sa mga lumolupyo, walay pagpinig kon unsa sila nga partido nga midapig. Awhag lang hinuon ni Tumulak nga ang mga ambulansya nga iyan sa City Hall ug gipangdestino sa kabarangayan angay gayud nga hatagan og tukma nga gidaghanon sa gasolina aron dili maparalisar ang iyang serbisyo.