DA7 Nag-Zumba for Rice

Mikabat sa 150 ka mga trabahante sa Department of Agriculture (DA)7 ang misalmot sa Zumba for Rice, nga gipahigayon didto sa Park Mall Kiosk, sa Mandaue City sa miaging Biyernes sa hapon.

Gipangunahan ni DA7 Regional Executive Director Angel C. Enriquez, ang mga kawani nga lalaki ug babaye natagbaw sa ilang sayaw sa walay bugto nga Zumba music sulod sa usa ka oras gikan sa alas 5:00 hangtud sa alas 6:00 sa hapon.

Sa pagpamulong ni Director Enriquez sa wala pa sila manayaw sa Zumba, iyang gipahinumdom nga ang maong kalihokan usa lang ka bahin sa kasaulogan sa National Rice Awareness Month(NRAM) nga gisaulog gikan sa Nobyembre 1-30 niining tuiga.

Ang Zumba for Rice ilang gipahigayon tungod kay nasud-ong ni Enriquez ang iyang mga sakop nga kasagaran dagko na kaayo og lawas, lalaki ug babaye.

Miingon siya nga wala sila maanad sa pagpahigayon niini matag tuig, apan kun ganahan ang iyang mga sakop nga ilang iapil sa kasaulogan sa NRAM matag Nobyembre ang Zumba for Rice, “aw mahimong amo kining buhaton matag tuig”, matud pa ni Enriquez.

Ang Zumba for Rice usa ka matang sa ehersisyo nga nakapaugnat gyud sa kusog sa tanang misalmot niini.

Nagsul-ob silang tanan og Singlet nga green ang kolor, may pipila nga maayo kaayong mosayaw nga mipakita sa ilang kahanas sa pagkiay-kiay nga madanihon kaayong tan-awon busa nalingaw ang publiko nga misaksi kanila.

Miingon si Enriquez nga giganahan usab ang uban, apan may pipila usab nga gikapuyan sa pagpunay og lukso, tuyok-tuyok, igwad-igwad, kiay-kiay, ug tanang aksyon sa lawas nga giduyogan sa makapakiat sa lawas usab nga tugtog sa musika.

Sa wala pa ang Zumba for Rice, gipahighayon usab didto gihapon sa Park Mall ang Rice cooking contest sa mga estudyante sa college diin ang University of Cebu (UC) college department maoy migawas nga mananaog.

Matud pa ni Enriquez nga ila kining gihimo aron magpakabana ang katawhan sa kamahinungdanon sa pagkaon nga humay, “busa dili nato kini angay nga usik-usikan kay walay tawo nga makagama og humay”, matud pa ni Enriquez.

Midugang siya nga ang pagkaon nga humay grasya nga gikan sa Dios, busa ato kining mahalon, kun maglung-ag igo-igoon lang nga mahurot gyud sa pamilya, kun may bahaw dili angay ilabay sa gawas kundili lutoon kini pag-usab aron mobaik ang iyang kalab-as ug kaonon”, dugang pa ni Enriquez.