DA: Sa Tuig 2015, Abunda na ang Mais sa Nasud

Misaad ang Department of Agriculture (DA) nga sa tuig 2015, mahimong kampiyon na nga tanom sa nasud ang mais tungod sa dakong hinabang sa gobyerno alang sa mga mag-uuma og mais ug ang maayong paghipos sa binhi niini.

Sumala ni Agriculture Secretary Proceso Alcala nga ang Pilipinas hapit na mahingpit sa iyang pagbaton og tukmang gidaghanon sa mais.

Gipasalig ni Alcala nga tungod sa mga modernong kahimanan nga giluwat sa kagamhanan ngadto sa mga dagkong umahan sa mais sa nasud, sa tibuok tuig sa 2015, hayan nga walay undang ug bugto ang ani sa mais sa nagkalainlaing dapit sa nasud.

Matud pa ni Alcala nga gumikan sa gitawag niyang “corn -in-a-cob-dryer” nga hinatag ni Presidente Benigno Aquino, iyang gitataw nga mao kini pasilidad nga magamit sa walay bugto nga ani sa produkto sa mais sa tibuok nasud sa sunod tuig.

Midugang ang kalihim sa DA nga sa unang higayon ubos sa administrasyon ni Presidente Aquino namugna ang mga “seed banks” diin usa niini mao ang maayong hiposanan sa binhi sa mais ug uban pang matang sa tanom nga kun magkinaunsa man ang kahimtang sa panahon may ikahulip dayon nga mga binhi aron dili maputol ang ani, sumala ni Alcala.

“May reserbang mga binhi sa matag lalawigan sa nasud”, sumala ni Alcala.

Sa sayo pa gibutyag sa DA nga ang produksyon sa mais sa miaging tuig abunda kaayo nga nakaabot sa hustong gidaghanon sa konsumo sa mga Filipino ug sa panginahanglan sa merkado niini.

Ang produkto nga mais sa nasud dili lamang igo nga konsumo sa mga kumakaon og mais apan alang usab sa mga kompaniya nga nagpabrika og pagkaon sa kahayopan diin ang mais maoy nag-una nga engrediente niini nga labi nilang gikinahanglan sa ilang produksyon sa lawog sa hayop.

Nasuta matud pa ni Alcala nga ang produksyon sa mais misaka gikan sa 3.4 metriko tonilada nga ani matag ektarya ngadto na sa 4.2 metriko tonilada matag ektarya sukad pa sa milabayng katuigan gumikan sa pagsagop sa nasud sa maayong mga binhi ug sa bag-ong teknolohiya.

Ang Pilipinas nakadaginot og kapin sa P60 bilyones sa gipamalit nga mais niini gikan sa gawas gikan sa 2010 ngadto sa 2013, sumala sa DA.

Midugang ang DA nga kaniadto ang Pilipinas nangkompra og mais gikan sa gawas sa nasud nga balor og tag P28 bilyones matag tuig.

Image Credit: www.skyscrapercity.com