DA: Modelong Pamilyang Mag-uuma Gitun-an sa Gobyerno

Ang International Fund for Agricultural Development (IFAD) sa United Nations, Civil Society Organizations (CSOs), Departments of Agriculture (DA) ug Agrarian Reform (DAR) inabagan sa Food and Agriculture Organization (FAO) mipahigayon og Knowledge and Learning Market and Policy Engagement (KLM-PE) niadtong Nobyembre 24–25 didto sa Bureau of Soils and Water Management Convention Hall in Quezon City.

Ang duha ka adlaw nga KLM-PE nga may tema nga “Strengthening Resilient Family-Based Agricultural Enterprises” mituon sa mga paagi sa pagpili og mga modelo nga mga pamilyang mag-uuma sa nasud nga may labot sa kasaulogan sa 2014 International Year of Family Farming (IYFF).

Gitambongan sa mikabat sa 300 ka tawo ang gikan sa mga ahensya sa kagamhanan,organisasyon sa mga mag-uuma, mga non government organizations ug sa pribadong sektor.

Sumala ni Department of Agriculture (DA) Secretary Proceso J. Alcala, nga ang KLM-PE maoy mopalig-on sa panagtambayayong sa kagamhanan ug pribadong sektor sa pagpalambo sa mga pamilyang mag-uuma sa nasud.

Kini tungod kay alang kang Alcala, ang pamilyang mag-uuma maoy gilauman nga makapalambo sa industriya sa agrikultura sa nasud.

Gipasabot ni Alcala nga ang KLM-PE maoy mahimong dapit sa pagbinayloay og mga kasinatian gikan sa mga pamilyang mag-uuma nga angayan usab nga kahimoan og mga balaod sa kongreso.

Midugang si Alcala nga ang mga paagi sa pagpili sa mga pamilyang mag-uuma sa nasud uban ang ilang kasinatian sa malampusong pagpanguma, giandam alang sa umaabot nga Philippine economic integration karong sunod tuig.