DA Mi-Pasidaan: El Niño Bantayan

Nagpahigayon karon og awareness campaign ang Department of Agriculture (DA)-7 labot sa sugod nga pag-epekto sa Mild El Niño, base sa gipasidaan sa Pag-asa Mactan.

Ang Officer-in-Charge sa Operation Division sa DA-7 nga si Fabio Enriquez nagkanayon nga nanghatag sila karon og mga brochure ngadto sa mga kahugpongan ug asosasyon sa mga mag-uuma dinhi sa Sugbo pagpahibawo sa angay nga buhaton niining panahon sa El Niño.

Usa niini mao ang pag-andam sa tinubdan sa tubig alang sa mga tanum, sumala ni Enriquez. Si Enriquez nagkanayon nga usa sa labing dakong epekto sa El Niño mao ang pagkalangan sa pagpananum alang sa mga kamaisan ug kahumayan gumikan sa kauga sa yuta.

Miingon si Enriquez nga haum hinuon kining panahon sa ting-init sa ting-ani sa mga kahumayan sa sunod nga bulan tungod kay dali na man unya ang pagpauga sa pasi sa humay sa dili pa kini ipagaling.

Apan iyang gitataw nga lisod usab ang pagpananum unya niini tungod kay magkinahanglan man og igong tubig ang kahumayan.

Laing maapektohan niini mao ang mga utanon kay tubig man gihapon ang gikinahanglan niini.

Tungod niini, si Enriquez midugang nga gikabalak-an nila ang pagsaka sa prisyo unya sa utanon sa higayon nga mograbi ang kainit sa umaabot nga mga buwan.

Iya usab nga gitumbok nga dili kaayo makaapektar ang kainit ngadto sa mga kahayopan, apan ang ilang buhatan miawhag sa mga nanag-iya og kahayupan nga pasilungan gayud ang mga hayop aron dili kini magkasakit.