DA-7 Mitin-aw: GMC, Dili Makadaot sa Lawas

Walay angay ikabalaka ang publiko sa mga “Genetically Modified Crops” (GMC) o kadtong mga tanom nga gimugna pinaagi sa artipisyal nga paagi.

Kini ang gitin-aw sa Department of Agriculture (DA) taliwala sa kahadlok sa ubang grupo nga nag-ingong makadaot kini sa panglawas sa tawo.

Gipasabot ni Dr. Antonio Alfonso, hepe sa DA Biotechnology Program, ug plant molecular biologist nga adunay mga pagtuon nga magpamatuod nga luwas kaonon ang mga GMC crops.

Gani sa kasamtangan, adunay GMC crops nga gitanom ug gitun-an karon dinhi sa nasud nga naglakip sa golden rice, Bt corn ug Bt talong.

Matud pa sa pagtuon, mas kusog ang resistensya sa mga GMC batok sa mga sakit ug peste sa pananom.

Sa tabang sa biotechnology, gibutang ang gene sa bacillus thuringiensis o Bt, usa ka matang sa good bacteria sa tanom nga maoy moaway sa mga insekto.

Tungod niini, dili na kinahanglang mogamit pa og pesticide ang mga mag-uuma aron sa pagpakusog sa produksyon.

Base sa pagtuon sa mga eksperto, daku usab ang makuhang nutrisyon gikan sa mga GMC products.

Samtang nagpadayon usab ang pagpaningkamot sa DA aron hingusgan pa ang sektor sa agrikultura pinaagi sa paggamit og bag-ong teknolohiya.