CPP-NPA, Posibling Mo-Resbak

Nangandam na karon ang mga sakop sa kapolisan ug militar kay nagtoo sila nga mobawos pagpangatake ang mga rebeldeng New People’s Army (NPA) tungod sa pagkasikop sa duha nila ka lider dinhi sa Sugbo kaniadtong Sabado.

Ang magtiayong Benito Tiamzon ug Wilma Tiamzon nasikop sa mga sakop sa Intelligence Service of the Armed Forces of the Philippines (ISAFP) uban sa lima ka kauban didto sa kabukiran sa Aloguinsan.

Chairman sa CPP-NPA

Si Benito Tiamzon maoy giila nga tsirman sa Communist Party of the Philippines (CPP) samtang ang iyang asawa maoy secretary general. Gidakop sila sa mga tinugyanan sa balaod tungod sa kaso nga multiple murder ug frustrated murder nga pending sa mga hukmanan.

Duha ka warrant of arrest maoy gibasihan sa mga tinugyanan sa balaod nga gidakop nila si Tiamzon. Ang warrant naglambigit kini sa pagpangatake nga gihimo didto sa Samar pipila ka buwan na ang nakalabay diin daghan ang namatay.

Isip mga lider sa CPP, sila usab ang gikatahong gibasol sa gihimong pag-raid sa mga NPA sa usa ka police station didto sa Mindanao kaniadtong Marso 10 ug pagbanhig sa military convoy nga misangpot sa pagkamatay sa 10 ka sundalo ug polis.

Negotiating Panel sa NPA

Apan si Luis Jalandoni, tsirman sa Negotiating Panel sa CPP, mikondinar sa iyang gihulagway nga illegal nga pagdakop sa magtiayon’g Tiamzon kay kalapasan kini sa kasabotan nga gipirmahan niadtong 1995 sanglit kabahin sila sa CPP negotiating team.

Gitoohan nga ang pagkasikop sa magtiayong Tiamzon makadaot sa panagsabot-sabot sa kagamhanan ug CPP/NPA aron pagkab-ot ang kalinaw sa Pilipinas. Kini maoy rason nga ang kapolisan ug militar gipahimangnoan nga dili g’yud mokompyansa.

Checkpoint

Nadakpan sila si Tiamzon sa police ug military checkpoint nga gipahigayon didto sa kabukiran tunga-tungang bahin sa dakbayan sa Carcar ug Aloguinsan sa miaging Sabado sa gabii.

Gihulagway sa militar nga ang pagkasikop sa magtiayong Tiamzon kadaogan sa kagamhanan sa kampanya batok sa insurgency.

Bakante na ang Liderato

Si General Emmanuel Bautista sa AFP miingon nga isip mga lider sa CPP-NPA, sila si Tiamzon maoy nagsugo sa ilang mga guerilla fighters nga ipadayon ang pag-armas ug sa paghimo’g kagubot ug pagpamatay.

Matud ni Bautista nga karong nadakpan na ang pangulo sa CPP-NPA, bakante na ang liderato sa CPP sa nasud nga nakigbatok sa kagamhanan sulod na sa 45 ka tuig.

Lima ka Kauban

Ang lima ka kauban nila ni Tiamzon giapil pagdakop kay matud pa nasakmitan usab kini og mga armas ug eksplosibo apan wala dayon ibutyag kun unsa ang mga armas nga nakuha. Ang mga dinakpan gidala na didto sa ISAFP headquarters sa kaulohan kagahapon.

Padayun ang Peace Negotiation

Si Presidente Aquino naglaum gihapon nga bisan sa pagkasikop sa magtiayong Tiamzon mapadayon gihapon ang negosasyon sa kalinaw.

Base sa rekord sa militar ang mga rebelde kaniadtong 1980 adunay 26 mil ka sakop apan karon nabinlan na lang og mga 4,000.

Image Credit: newsinfo.inquirer.net