COSAP Paspasan ang Kampanya Batok ‘Adis-adis’ sa City Hall

Gipasalig sa bag-ong hepe sa City Office for Substance-Abuse Prevention (COSAP) nga paspasan niya paghimo’g kampanya pagpuo sa mga “adis-adis” nga kawani sa Cebu City Hall.

Matud ni Dr. Alice Utlang nga ang una niya nga himoon sa pagsugod niya’g asumier sa katungdanan karong adlawa mao ang pagsuta kon pila ang gahin nga salapi alang sa COSAP ning tuiga.

Kini aron nga makapalit dayon siya og mga Drug Testing Kits nga gikinahanglan alang sa paghimo og kinalit nga drug testing sa mga kawani nga tiggamitan og gidili nga matang sa drugas.

Usa si Utlang nga naapektahan sa bag-ohay pa lang gipatuman nga paglahugay sa mga kawani sa City Hall nga gimando ni Mayor Michael Rama.

Misuway unta si Dr. Utlang paghangyo sa mayor nga ibalik ra siya pagdistino isip city veterinarian apan wala gayud kini tumani ni Mayor Rama.

Si Utlang miisip na lang nga daku kining hagit kaniya kay kaniadto ang mga iro ug iring maoy gihatagan niya og pag-atiman samtang karon ang mga tawo na gayud maoy iyang protehean gikan sa drugas.

Sutaon usab ni Utlang kon unsa’y nahitabo sa mga gipahigayong drug testing kaniadto kon ang mga hingtungdang kawani nga napositibo sa drugas napalagpot ba gayud sa trabaho.

Adunay report nga kadtong mga napositibo sa gidili nga matang sa drugas nagpadayon gihapon sa pagtrabaho sa kagamhanan sa dakbayan.

Giawhag ni Utlang ang katawhan nga moreport kaniya kon masayud sila nga adunay mga kawani sa City Hall nga mga adis-adis.

Hinoon palamboon usab ni Utlang ang paghimo og education campaign aron ang mga tawo makasabot nga dili maayo nga magpakahilom lang sa kampanya batok sa gidiling drugas.

Image Credit: www.spectrogroup.com