Comelec: Rehistrasyon sa SK Eleksyun Ugma nalang Kutob

Ugma adlawa nalang kutob ang rehistrasyon sa mga batan-on nga gustong mobotar sa adlaw sa piniliay sa Sanggunaing Kabataan, unya sa Pebrero 21, 2015.

Apan kasagaran sa mga buhatan sa Commission on Elections (COMELEC) dinhi sa syudad ug sa lalawigan sa Cebu, dyutay ra kaayo ang nagparehistro nga mga batan-on sukad niadtong Septembre 20 hangtud karon.

Tungod kay gibaod sa Comelec nga walay ihatag nga extension ang maong rehistrasyon, kadtong dili makaparehistro karon, dili gayud makabotar sa SK elections.

Sayo niini, gimando sa Comelec Cenral Office ang pagbukas sa ilang buhatan sa Sabado ug Domingo sukad niadtong Septembre 20 ug 21, ug Septembre 27-28 pagdawat sa mga magparehistro.

Kini aron paghatag og higayon sa mga estudyante kinsa walay panahon sa pagparehistro gikan sa Lunes kutob Biyernes.

Naningkamot ang maong ahensya nga magpakabana ang mga nagpangidaron og 15-17 anyos nga makabotar sa piniliay sa SK.

Gani, may COMELEC Memorandum alang sa tanang regional election directors, provincial election supervisors, election officers and acting election officers nga nagmando sa pagpatuman sa Resolution No. 9899 diin ang mga opisyal ug empliyado sa Comelec, patrabahoon sa mga adlaw nga Sabado ug Domingo sa panahon sa rehistrasyon.

Ang maong Memorandum nagtakda sa overtime sa maong mga kawani gikan sa alas 8:00 sa buntag hangtud sa alas 5:00 sa hapon sa Septembre 20- 21, ug 27-28, 2014.

Hinuon gawas sa mga batan-on, padayon gihapon ang rehistrasyon sa mga hamtong ilabi na sa mga persons with disability (PWDs), senior citizens, ug mga babayeng nagsabak diin may express lane nga giandam ang Comelec alang kanila.