Comelec: Overtime Nga Suhol sa Taga Comelec, Nausik

Giangkon ni Cebu Commission on Election (COMELEC) Provincial Supervisor Atty. Lionel Marco Castillano nga nausik lamang ang overtime pay sa pipila ka mga kawani sa COMELEC sa gipahigayon niining “continuing registration” alang sa mga bag-ong botante matag Domingo.

Kini tungod kay may mga lugar nga wa gyuy mga botante nga nagparehistro sa maong adlaw nga gigahin unta sa Comelec alang sa mga trabahante ug estudyante nga may klase ug trabaho gikan sa Lunes hangtod sa Sabado.

Gumikan niini, sugod niadtong Agosto 18, 2014 ,ang Comelec nalang sa mga syudad sa Sugbo, Mandaue ug Lapu-lapu maoy gitugotan sa pagbukas sa ilang buhatan matag Domingo alang sa pagpanawat og mga botanteng magparehistro.

Matud pa ni Castillano nga ang ubang component cities ug kalungsoran sa lalawigan sa Sugbo mibalik na sa naandan nga adlaw sa pagpangrehistro gikan sa Lunes hangtud sa Biyernes.

Iya hinuong giklaro nga tugotan lamang nila nga makabukas ang COMELEC office sa kalungsoran ug ubang mga syudad sa lalawigan sa adlaw nga Sabado sa higayon nga may mga non-government organization, pundok sa simbahan ug uban pang grupo nga mohangyo kanila alang sa dinaghgang sakop niini nga moparehistro.