COMELEC Mimando Pagtangtang sa mga Campaign Posters sa Duha ka Kandidato

Duha ka kandidato pagka konsehal sa dakbayan sa Sugbonga sakop sa Team Rama ug Bando Osmeña Pundok-Kauswagan (BOPK) ang gimandoan sa Commission on Elections nga panguhaon ang ilang propaganda materials nga gibutang sa pribadong property diha sa Carreta.

Ang opisina ni Cebu City Election Officer Marchel Sarno nakadawat og pormal nga reklamo gikan ni Dennis Maravillas nga maoy miangkong tag-iya sa nahisgutang property nga nahimutang sa dalan J. de Vera Street.

Matud ni Maravillas nga wala gayud mananghid kaniya sila si Konsehal Alvin Arcilla ug Sambag 1 Barangay Captain Jerry Guardo nga butangan nila og daghang campaign posters ang iyang property nga gigamit isip truck yard.

Ang usa ka pahina nga reklamo ni Maravillas gipaubanan niya sa hulagway nga nagpakita nga ang ganghaan ug pader sa compound maayong pagkabulit sa daghang campaign posters sa duha ka kandidato.

Si Sarno miisyu na kagahapon og kamandoan ngadto sa duha ka kandidato pagka konsehal nga ipakuha ang maong mga campaign posters. Matud ni Sarno nga una pa kini nga pormal nga reklamo nga nadawat sa iyang opisina kabahin sa mga campaign posters nga gibutang sa pribadong lugar nga walay pananghid. Gipasabot ni Sarno nga ang mga campaign posters nga gibutang sa wala itugot nga dapit mahimo ra nga panglangkaton sa mga tag-iya sa balay o kaha property kon wala kini mananghid kanila.

Ang lagda mao nga ang campaign posters ug ubang propaganda materials sa mga kandidato anha ra gayud ibutang sa dapit nga giisip nga “common posters area” nga gideklarar sa Comelec.

Si Mayor Michael Rama miingon nga kinahanglang ang Comelec patas gayud sa paghimo’g aksyon sa mga reklamo aron dili sila katahapan nga may gipaboran nga kandidato.