Colon Night Market Molungtad Hangtod sa Disyembre 30

Subay sa Downtown Revitalization Project sa kagamhanan ning dakbayan nga gipangulohan ni Mayor Michael Lopez Rama, natukod ang Night Market diha sa pinaka-karaang dalan sa tibuok Pilipinas nga mao ang Colon Street.

Sa pakighinabi sa BARUGG News kang George Chu, ang gitahasan ni Mayor Rama nga mangulo sa Downtown Revitalization Project gibutyag niini nga molungtad hangtod na sa Disyembre 30, 2015 adlawng Miyerkules ang ika-upat nga pagpahigayon sa Night Market karong tuiga nga pormal nga gisugdan niadtong Nobiyembre15 adlawng Domingo ning tuiga.

Ang kalihokan nga anaa na sa ika-walong tuig karon gipahigayon ka-upat ka higayon sulod sa usa ka tuig. Kini naglangkob sa bulan sa Enero alang sa selebrasyon sa Sinulog, sulod sa tunga-tunga sa bulan sa Mayo hangtod na sa tibuok bulan sa Hunyo alang sa pag-abli sa klase ug sa pagselebrar sa Cebu Business Month, sulod sa bulan sa Agosto o Septiyembre alang sa paghandom sa Ramadan, ug sa hinapos sa bulan sa Nobiyembre hangtod na sa bulan sa Disyembre alang sa pagsaulog sa Pasko ug Bag-ong Tuig.

Kahinumdoman nga nagsugod ang programa niadtong tuig 2007 tungod sa inisyatiba ni Mayor Rama nga maoy kanhi Bise Mayor sa maong tuig. Kini usab human sa malampusong pagpahigayon sa Association of South East Asian Nation (ASEAN) Summit nga gipahigayon ning syudad sa susamang tuig.

Tumong niini nga mabalik ang kanindot sa Colon Street nga maoy sentro sa patigayon, komersyo ug industriya kaniadto dinhi sa Sugbo. Magsilbi usab kining sama sa Divisoria sa Manila nga maghatag ug oportunidad sa tanan nga makapamalit ug mga baratong kagamitan sama sa mga sinina, sapatos, gamit sa balay, gamit sa eskwelahan ug opisina, burloloy, mga lamiang pagkaon ug uban pa.

Gibutyag usab sa BARUGG News ni Dennis Hassim, usa lamang sa mga namaligya sa Night Market kinsa nagsugod sa pagsalmot sa programa sukad sa pagsugod niini nga, “Dako among pasalamat kang Mayor Rama nga natabangan mi sa among panginabuhi. Dako ni ug tabang namo.”

Samtang surpresa usab nga mibisita si Mayor Rama niadtong Disyembre 13 adlawng Domingo didto sa Colon Street aron personal nga sutaon ang pagpahigayon sa Night Market.

Gihingusgan usab sa dakbayan nga mapatuman ang kahapsay ug siguridad alang sa pagpahigayon sa operasyon sa Night Market nga masugod sa alas-Sais sa gabii ug molungtad na hangtod sa ala-Una sa kaadlawon.

Motabang usab sa mga Kapolisan ang Cebu City Unified Security Group, mga tanod sa barangay, ug mga intelligence network sa pagmonitor ug pagpatrolya sa naasoy nga dapit. (Cebu City Public Information Office PIO/Greggy Jiggs P. Senados)