Coloma: Pagpalambo sa Nasud Gitutokan

Padayon ang administrasyong Aquino sa pagtutok sa paningkamot aron makab-ot ang paglambo sa nasud nga maoy angay unahon sa gobyerno.

Kini ang gitumbok ni Kalihim Herminio Coloma, Jr. sa Presidential Communications Operations Office (PCOO) miaging semana isip tubag sa gipahigayong survey sa research group nga Ibon Foundation diin migawas nga daghang Filipino ang naningkamot nga makabaton og ikabayad sa mga nag-unang panginahanglan sama sa pagkaon ug tambal.

“Patuloy na nakatuon ang pagsisikap ng pamahalaan na makamtan ang kaunlaran upang mabawasan ang karalitaan at lumaganap ang pagkalingang panlipunan alinsunod sa Philippine Development Plan,” matud pa ni Coloma.

Giingong padayon ang mga hingtungdang mga ahensiya sa gobyerno sa pagbantay sa presyo sa mga nag-unang panaliton ug naghimo na og mga mahinungdanong lakang aron matabangan ang katawhan, ilabi na ang mga kabus nga sektor sa katilingban.

Matud pa sa Kalihim nga gitagaan og pagtagad sa administrasyong Aquino ang resulta sa maong survey sa Ibon sugod Enero 18 hangtud 24 pinaagi sa 1,500 ka tawo ang gipangutana.

Sa gipahigayong survey, 54.8 porsiyento sa mga gipangutana ang miingon nga naglisud silang makapalit og igo nga pagkaon sa milabay nga 3 ka buwan, samtang 53 porsiyento usab ang mipahayag nga naglisud sila sa pagpalit og tambal o pagbayad sa konsultasyon sa doktor kun aduna sila’y sakit.

Gitumbok ni Coloma nga sa nasudnong budget sa 2014, migahin ang gobyerno og P87.1 bilyon alang sa Universal Health Care, ilabi na sa mga serbisyong may kalabot sa paglikay sa mga sakit ug aron maapil sa health insurance coverage ang may 14.8 milyong kabus.

Gawas niini, migahin usab og P79 ka bilyon ang gobyerno aron masigurong hapsay nga mapatuman ang mga mahinungdanong serbisyo ilabi na ang mga gipaubos sa gipalapdang P62.6 ka bilyon nga programang Pantawid Pamilyang Pilipino.

Gipasabot usab sa Kalihim nga gihimo ang Ibon Survey sa dihang misaka sa 4.2 porsiyento ang inflation tungod sa mga nahitabo sa kalibotan, ilabi na ang pasikaranan sa US Federal Reserve nga nakaapekto sa pinalitay sa dolyar sa peso.

Matud pa ni Coloma nga padayong misalig ang atong mga economic managers nga ang inflation mapadayon sa 3 hangtud 5 ka porsiyento nga target sa Development Budget Coordination Committee.